20 მარტს, ბედნიერების საერთაშორისო დღესთან დაკავშირებით, გაეროს მხარდაჭერით მომზადებული ბედნიერების მსოფლიო ანგარიში გამოქვეყნდა. ყოველწლიური ანგარიში, რომელიც მეცამეტედ მომზადდა, სხვადასხვა ქვეყანაში მცხოვრებ ხალხს საკუთარი ცხოვრებით კმაყოფილებას აფასებინებს და ასე ადგენს ყველაზე ბედნიერი ერების ჩამონათვალს.

უკვე ზედიზედ მერვედ, მსოფლიოში ყველაზე ბედნიერ ქვეყნად ფინეთი დასახელდა. 10-ქულიანი სისტემით ფინეთს ანგარიშში 7,736 აქვს მინიჭებული. აღსანიშნავია, რომ საუკეთესო ხუთეულში ჩრდილოეთ ევროპის ოთხი ქვეყანაა. ექსპერტები მთავარ მიზეზად ბუნებასთან სიახლოვეს და სოციალური კეთილდღეობის სისტემას ასახელებენ.

სხვათა შორის, ათეულში პირველად მოხვდნენ კოსტა-რიკა და მექსიკა, რასაც ექსპერტები მტკიცე ოჯახური კავშირების გავლენას მიაწერენ.

რაც შეეხება საქართველოს, ჩვენი ქვეყნის პოზიცია შარშანდლის შემდეგ არ შეცვლილა — 5,4 ქულით, ჩამონათვალში ისევ 91-ე ადგილს ვიკავებთ. მანამდე, 2023 წელს, 90-ე პოზიციაზე ვიყავით, უფრო ადრე კი, მაგალითად, 2020-ში — 117-ე ადგილი გვეკავა.

ბედნიერების ანგარიშის წლევანდელი ათეული კი ასე გამოიყურება:

1. ფინეთი
2. დანია
3. ისლანდია
4. შვედეთი
5. ნიდერლანდები
6. კოსტა-რიკა
7. ნორვეგია
8. ისრაელი
9. ლუქსემბურგი
10. მექსიკა

ბედნიერების ანგარიშის კვლევის მეთოდი ასეთია: სხვადასხვა ქვეყანაში მცხოვრებ ადამიანებს 0-დან 10-მდე სკალით აფასებინებენ საკუთარ ცხოვრებას, სადაც 0 ყველაზე საშინელ მდგომარეობას ასახავს, 10 კი — საუკეთესოს.

წლევანდელ კვლევას კიდევ ერთი საინტერესო მიგნება აქვს: უცხო ადამიანები იმაზე ორჯერ უფრო კეთილები არიან, ვიდრე ჩვენ გვგონია. ეს პატარა ექსპერიმენტით შეფასდა: ქუჩაში საფულე განზრახ დააგდეს და ჩაინიშნეს, თუ რამდენმა უცხო ადამიანმა დააბრუნა ის, შემდეგ კი შეადარეს იმ ადამიანების რაოდენობას, ვინც იფიქრა, რომ საფულეს დააბრუნებდნენ. ექსპერიმენტზე დაყრდნობით, კვლევა მიუთითებს, რომ სიკეთე იმაზე მჭიდროდაა ბედნიერებასთან დაკავშირებული, ვიდრე აქამდე ფიქრობდნენ: "ხალხი იქ უფრო ბედნიერია, სადაც მიაჩნიათ, რომ ერთმანეთზე ზრუნავენ".

ზოგიერთი ქვეყნის გაუარესებულ შედეგებს კვლევა პოლიტიკურ პოლარიზაციას მიაწერს, ბედნიერების მაღალ ხარისხს კი უკავშირებს თანაცხოვრებასაც: ლათინური ამერიკისა და ევროპის რამდენიმე ქვეყანაში, სადაც მონაცემი მაღალია, ერთ სახლში ხშირად ოთხი და ხუთი ადამიანი ცხოვრობს.

"ბედნიერების საფუძველი ნდობა, სიკეთე და სოციალური კავშირებია", — აფასებს კვლევას გაეროს მდგარი განვითარების ქსელის პრეზიდენტი ჯეფრი დ. საქსი, — "თითოეულ ჩვენგანზეა დამოკიდებული, თუ როგორ ვაქცევთ ამ სიმართლეს მოქმედების წინაპირობად, რათა მსოფლიოში მშვიდობას, ურთიერთპატივისცემასა და საზოგადოებრივ კეთილდღეობას შევუწყოთ ხელი".

თანამედროვე გამოწვევების გადაჭრის გზების ძიების მნიშვნელობას უსვამს ხაზს ოქსფორდის მკვლევარი ჟან-ემანუელ დე ნივიც.

"სოციალური იზოლაციითა და პოლიტიკური პოლარიზაციით მოცულ ჩვენს ეპოქაში, გვჭირდება, ვიპოვოთ ახალი გზა, რომ ადამიანები მაგიდის გარშემო ისევ შემოვიკრიბოთ — ეს კრიტიკულად მნიშვნელოვანია როგორც ინდივიდუალური, ასევე კოლექტიური კეთილდღეობისთვის".