კულტურისა და სპორტის მინისტრი მიხეილ გიორგაძე დღეს ძიუდოისტებს შეხვდა. მისი თქმით, შეხვედრამ მშვიდად და კონსტრუქციულად ჩაიარა.

"ვაღიარებ, რომ საკმაოდ მწვავედ დგას საკითხი, ამიტომაც სიღრმისეულ შესწავლას გულისხმობს ყველა ის საკითხი", - განაცხადა მინისტრმა.

მისივე განმარტებით, პრობლემების მოგვარებისთვის სპორტსმენებთან შეხვედრებს გააგრძელებს.

ძიუდოს ნაკრების რამდენიმე წევრი გუნდის კაპიტან ვარლამ ლიპარტელიანთან ერთად ფედერაციის პრეზიდენტის დავით ქევხიშვილის გადადგომას ითხოვს. ძიუდოისტები ქევხიშვილის გადადგომის მოთხოვნის მიზეზს, ერთი მხრივ, ნაკრების წარუმატებლობასა და მეორე მხრივ, ფედერაციაში არსებულ მძიმე და უსიამოვნო სიტუაციას უკავშირებენ.

სპორტსმენები აცხადებენ, რომ თუ დავით ქევხიშვილი არ გადადგება, ისინი საერთაშორისო ტურნირებში მონაწილეობას აღარ მიიღებენ.

დავით ქევხიშვილის თქმით, ის გადადგომას არ აპირებს და ბრძოლას გააგრძელებს. ის ძიუდოისტებს 10 მაისს, ყრილობაზე ეპატიჟება და მიმართავს, რომ იქ ჩამოწერონ თავიანთი პრეტენზიები

აპრილის ბოლოს ევროპის ჩემპიონატიდან უმედლოდ დაბრუნების შემდეგ ძიუდოს ნაკრების მთავარმა მწვრთნელმა, ირაკლი ცირეკიძემ გუნდი დატოვა, გადადგა მთელი სამწვრთნელო შტაბი.