ევროპის ჩემპიონატიდან უმედლოდ დაბრუნების შემდეგ ძიუდოს ნაკრების მთავარმა მწვრთნელმა, ირაკლი ცირეკიძემ გუნდი დატოვა, გადადგა მთელი სამწვრთნელო შტაბი.

ამის შესახებ ძიუდოს ფედერაციის პრეზიდენტმა დავით ქევხიშვილმა ფეისბუქზე გავრცელებულ ვიდეოში განაცხადა.

"შედეგის მიუღწევლობას ბევრი მიზეზი აქვს, მაგრამ დღეს ამის მოყოლას არ აქვს მნიშვნელობა, ჩვენთვის მთავარია შედეგი, რომელიც ვერ მივაღწიეთ. ჩვენ გვესმის რომ ეს არის სპორტი და ყოველთვის შეიძლება მოხდეს ასეთი რამ, მაგრამ ეს იმას არ ნიშნავს, რომ პასუხისმგებლობას ვერ ვიზიარებთ. სამწვრთნელო შტაბი და მთავარი მწვრთელი ეროვნულ ნაკრებთან არ გააგრძელებს საქმიანობას", - განაცხადა ძიუდოს ფედერაციის პრეზიდენტმა დავით ქევხიშვილმა.

მისი თქმით, ძიუდოს ფედერაცია სამომავლო გეგმებზე მოგვიანებით გაავრცელებს ინფორმაციას.

სამწვრთნელო შტაბისა და მთავარი მწვრთნელის გუნდიდან წასვლამდე, ევროპის ჩემპიონატზე ქართველი ძიუდოისტების წარუმატებელი ასპარეზობა გააკრიტიკა ყოფილმა ძიუდოისტმა, ოლიმპიადის გამარჯვებულმა ზურაბ ზვიადაურმა. მან ნაკრების წარუმატებელ შედეგებში ძიუდოს ფედერაციის პრეზიდენტი დავით ქევხიშვილი დაადანაშაულა.

"არ ვიცი საიდან დავიწყო.. ამას ვამბობდი წლების წინ, რომ ქევხიშვილი ანადგურებს ძიუდოს და მომკითხავი სამწუხაროდ არავინ არ არის! მინდა ყველამ ამოიღოს ხმა, ვისაც ესმის სპორტი და ვისაც შესტკივა გული დღევანდელ მდგომარეობაზე.... შეიძლებ კიდევ ის მომაწერონ, რომ მე ინტერესი მაქვს ფედერაციის მაგრამ აქვე გავიმეორებ, რომ არანაირი ინტერესი არ გამაჩნია, გარდა კეთილდღეობისა! მინდა ქართული ძიუდო ისევ იმ ადგილს და ტიტულს დაუბრუნდეს როგორიც წლების უკან იყო!", - დაწერა ზურაბ ზვიადაურმა ფეისბუქზე.

საქართველოს ძიუდოს ნაკრები თელ-ავივში გამართულ ევროპის ჩემპიონატზე დამარცხდა და კონტინენტის პირველობა მედლების გარეშე დაასრულა. საქართველოს ნაკრები ევროპის ჩემპიონატზე 9 ძიუდოისტით იყო წარმოდგენილი.

ტურნირზე მედალთან ყველაზე ახლოს ამირან პაპინაშვილი და გურამ თუშიშვილი იყვნენ. თუმცა ქართველმა ძიუდოისტება ბრინჯაოს ბრძოლები დათმეს.

საქართველოს ძიუდოისტთა ნაკრებმა, პირველად, ევროპის ჩემპიონატი მედლების გარეშე დაასრულა.