ძიუდოს ფედერაციის პრეზიდენტის დავით ქევხიშვილის თქმით, ის გადადგომას არ აპირებს და ბრძოლას გააგრძლებს. რუსთავი 2-თან ინტერვიუში ის ძიუდოისტების ბრალდებებს "უსაფუძვლოს" უწოდებს:

"ამ პრეცენდენტს ახლა თუ დავუშვებ, გამოვა რომ რეალურად ამ ქვეყანაში არც კანონს, არც სამართალს და არც სიმართლეს არანაირი ფასი არ აქვს. მე ვერ მოვისმინე ვერანაირი არგუმენტი იმასთან დაკავშირებით, თუ რაში შევუშალე მათ ხელი. მე მათ შევხვდი, თუმცა მათთან შეხვედრა არის ყვირილი, წივილი, აჟიოტაჟი და მეტი არაფერი".

ქევხიშვილი ძიუდოისტებს 10 მაისს, ყრილობაზე ეპატიჟება და მიმართავს, რომ იქ ჩამოწერონ თავიანთი პრეტენზიები:

"მე იქ აუცილებლად გავცემ პასუხს ყველა კითხვას".

ძიუდოს ფედერაციის განცხადებით, ყრილობაზე ფედერაციის პრეზიდენტის ანგარიშს წარადგენენ და მიმდინარე პროცესების განიხილავენ.

ძიუდოს ნაკრების რამდენიმე წევრი გუნდის კაპიტან ვარლამ ლიპარტელიანთან ერთად ფედერაციის პრეზიდენტის დავით ქევხიშვილის გადადგომას ითხოვს. ძიუდოისტები ქევხიშვილის გადადგომის მოთხოვნის მიზეზს, ერთი მხრივ, ნაკრების წარუმატებლობასა და მეორე მხრივ, ფედერაციაში არსებულ მძიმე და უსიამოვნო სიტუაციას უკავშირებენ.

სპორტსმენები აცხადებენ, რომ თუ დავით ქევხიშვილი არ გადადგება, ისინი საერთაშორისო ტურნირებში მონაწილეობას აღარ მიიღებენ.