სომხეთის მმართველმა რესპუბლიკურმა პარტიამ განაცხადა, რომ მხარს დაუჭერს პრემიერ-მინისტრად "ხალხის კანდიდატს", რომელსაც პარლამენტის მესამედი წამოაყენებს. ამ ეტაპზე პრემიერ-მინისტრობის ერთადერთი კანდიდატი ოპოზიციისა და ფრაქცია ელკის ლიდერი, ნიკოლ პაშინიანია.

მმართველი პარტიის განცხადების შემდეგ პაშინიანმა ერევანში, რესპუბლიკის მოედანზე შეკრებილ დემონსტრანტებს მიმართა და აქციის დაშლისკენ მოუწოდა. მან, განმარტა, რომ მომდევნო დღეების განმავლობაში პარლამენტში თავისი კანდიდატურის წამოყენებასა და რესპუბლიკური პარტიისგან გარანტიების მიღებაზე იმუშავებს.

"ხვალ ბავშვები სკოლაში წაიყვანეთ. თქვენ კი, ბავშვებო, წადით სკოლაში და ყველა გაკვეთილი ისწავლეთ", - განაცხადა პაშინიანმა.

პირველ მაისს სომხეთის ეროვნულმა კრებამ, პარლამენტმა ნიკოლ პაშინიანის კანდიდატურას მხარი არ დაუჭირა. პაშინიანს მხარი არ დაუჭირა რესპუბლიკურმა პარტიამ, რომელიც პარლამენტში უმრავლესობით არის წარმოდგენილი.

საღამოს, კენჭისყრის შემდეგ ოპოზიციის ლიდერი მოედანზე გავიდა ხალხს სამოქალაქო დაუმორჩილებლობის აქციების განახლებისკენ მოუწოდა.

პარლამენტი პრემიერ-მინისტრს 8 მაისს აირჩევს. ცნობილია, რომ მმართველი პარტია თავის კანდიდატს არ წამოაყენებს.

სომხეთის კონსტიტუციის მიხედვით, პრემიერ-მინისტრის ვერ არჩევიდან შვიდ დღეში განმეორებითი არჩევნები ტარდება. პრემიერობის კანდიდატურა მინიმუმ პარლამენტის მესამედმა უნდა წარადგინოს. თუ ქვეყნის პრემიერს პარლამენტი ისევ ვერ აირჩევს, ვადამდელი საპარლამენტო არჩევნები დაინიშნება.

ყოფილი პრემიერ-მინისტრი სერჟ სარგსიანი თანამდებობიდან 23 აპრილს, 11-დღიანი საპროტესტო აქციების შემდეგ გადადგა. ამის შემდეგ პრემიერ-მინისტრის მოვალეობის შემსრულებელი კარენ კარაპეტიანი გახდა.