სომხეთის პარლამენტმა ოპოზიციური მოძრაობისა და ფრაქცია ელკის ლიდერი, ნიკოლ პაშინიანი პრემიერ-მინისტრად არ აირჩია. პაშინიანს მხარი დაუჭირა 45-მა დეპუტატმა, წინააღმდეგი იყო 56.

მანამდე რესპუბლიკურმა პარტიამ, რომელიც სომხეთის პარლამენტის უმრავლესობას წარმოადგენს, განაცხადა, რომ პაშინიანს მხარს არ დაუჭერდა.

დღეს, პირველ მაისს სომხეთის პარლამენტი ახალ პრემიერ-მინისტრს ირჩევდა. პრემიერ-მინისტრობისთვის ნიკოლ პაშინიანს 53 დეპუტატის მხარდაჭერა სჭირდებოდა. 105 დეპუტატიდან პარლამენტის დღევანდელ სხდომას 102 დეპუტატი ესწრებოდა.

პაშინიანი იმედოვნებდა, რომ მმართველი პოლიტიკურ ძალა, რომელიც პარლამენტში 58 დეპუტატით არის წარმოდგენილი, ხალხის მოთხოვნას გაიზიარებდა და "ხალხის კანდიდატს" დაუჭერდა მხარს.

ყოფილი პრემიერ-მინისტრი სერჟ სარგსიანი თანამდებობიდან 23 აპრილს, 11-დღიანი საპროტესტო აქციების შემდეგ გადადგა. ამის შემდგე პრემიერ-მინისტრის მოვალეობის შემსრულებელი კარენ კარაპეტიანი გახდა.