ერევანში ტოტალური გაფიცვა დაიწყო. ოპოზიციური მოძრაობისა და ფრაქცია ელკის ლიდერმა, ნიკოლ პაშინიანმა მოქალაქეებს სამოქალაქო დაუმორჩილებლობის აქციისკენ მას შემდეგ მოუწოდა, რაც პარლამენტმა ის პრემიერ-მინისტრად არ აირჩია.

დილიდან ერევნის მთავარ რესპუბლიკის მოედანზე ათეულობით დემონსტრანტი დროშით გამოვიდა. მოქალაქეებმა ცოცხალი ჯაჭვებითა და მანქანებით ქალაქის ცენტრალური ქუჩები გადაკეტეს. გადაკეტილია გზა ერევნიდან ზვართნოცის საერთაშორისო აეროპორტამდე.

გუშინ, პირველ მაისს სომხეთის პარლამენტმა ნიკოლ პაშინიანი პრემიერ-მინისტრად არ აირჩია. პაშინიანს მხარი დაუჭირა 45-მა დეპუტატმა, წინააღმდეგი იყო 56.

მანამდე რესპუბლიკურმა პარტიამ, რომელიც სომხეთის პარლამენტის უმრავლესობას წარმოადგენს, განაცხადა, რომ პაშინიანს მხარს არ დაუჭერდა.

კენჭისყრის შემდეგ პაშინიანი რესპუბლიკის მოედანზე შეკრებილ მოქალაქეებთან გავიდა და სამოქალაქო დაუმორჩილებლობის აქციების განახლებისკენ მოუწოდა.