სამხრეთ ოსეთის დე ფაქტო რესპუბლიკის პრეზიდენტმა, ანატოლი ბიბილოვმა ოკუპირებულ ცხინვალის რეგიონში სირიის პრეზიდენტი, ბაშარ ალ-ასადი დაპატიჟა. ინფორმაციას ამის შესახებ ოსური მედია ავრცელებს.

ბიბილოვი იალტის მეექვსე საერთაშორისო ეკონომიკური ფორუმის ფარგლებში შეხვდა სირიის ოფიციალურ დელეგაციას, რომელსაც ეკონომიკის მინისტრი ხელმძღვანელობდა.

ანატოლი ბიბილოვმა, ოკუპირებული სამხრეთ ოსეთის სახელით, გამოხატა სოლიდარობა სირიელი ხალხის მიმართ, რომლებიც ეწინააღმდეგებიან "დასავლეთის ქვეყნების ტერორიზმსა და აგრესიას".

"ჩვენ ყურადღებით ვადევნებთ თვალს სირიაში მიმდინარე მოვლენებს. სამხრეთ ოსეთის მოსახლეობა თანაუგრძნობს სირიელ ხალხს, ვინაიდან კარგად ესმის, რასთან გაქვთ საქმე. მე დარწმუნებული ვარ, რომ სამართლიანობა იზეიმებს და სირიელი ხალხი კვლავ მშვიდობაში იცხოვრებს. ამაში წვლილს რუსეთის მიერ გამოყოფილი დახმარებაც შეიტანს", - განაცხადა ბიბილოვმა.

სამხრეთ ოსეთის დე ფაქტო რესპუბლიკის გარდა, სირიას სოლიდარობა გამოუცხადა დე ფაქტო აფხაზეთის რესპუბლიკამაც.

სირიის სამთავრობო ბაზების დაბომბვა

აშშ-ს, ბრიტანეთისა და საფრანგეთის ავიაციამ სირიის სამთავრობო ბაზები 14 აპრილს, გვიან ღამით დაბომბა. მთავარი სამიზნე დამასკოში არსებული სამეცნიერო-კვლევითი ცენტრი იყო.

აშშ მოკავშირეებთან ერთად ასადის რეჟიმს მშვიდობიანი მოსახლეობის წინააღმდეგ ქიმიური იარაღის გამოყენებაში ადანაშაულებს. სირიის პრეზიდენტი ბაშარ ალ-ასადი ბრალდებებს უარყოფს.

სირიის სამთავრობო ძალების მხრიდან ქალაქ დუმაში განხორციელებული, ქიმიური შეტევის შედეგად 70 ადამიანი დაიღუპა, ხოლო დაახლოებით 500 საავადმყოფოებში ქიმიური ინტოქსიკაციის ნიშნებით მოხვდა. ქიმიური იარაღის გამოყენების ფაქტი დაადასტურა ჯანდაცვის მსოფლიო ორგანიზაციამაც.