აშშ-ს პრეზიდენტმა დონალდ ტრამპმა, სირიის სამთავრობო ბაზების წერტილოვანი დაბომბვის ბრძანება გასცა. გადაწყვეტილებას შეურთდა დიდი ბრიტანეთისა და საფრანგეთის შეიარაღებული ძალებიც. ინფორმაციას ამის შესახებ CNN ავრცელებს.

"ცოტა ხნის წინ, მე ვუბრძანე ამერიკის შეიარაღებულ ძალებს, განეხორციელებინათ სარაკეტო შეტევები, იმ სამიზნეების მიმართულებით, სადაც მზადდება სირიის დიქტატორის ბაშარ ასადის ქიმიური იარაღი", - განაცხადა ტრამპმა თეთრ სახლში.

ამერიკის პრეზიდენტის თქმით, შეტევა კოორდინირებულია დიდი ბრიტანეთისა და საფრანგეთის მთავრობებთან. ტრამპის თქმით, შეტევა წარმოადგენს პასუხს გასულ კვირას, სირიის მთავრობის მხრიდან ქიმიური იარაღის გამოყენებაზე მშვიდობიანი მოსახლეობის წინააღმდეგ. დონალდ ტრამპის თქმით, შეტევა მიმართულია ქიმიური იარაღის წარმოების, გავრცელებისა და გამოყენების წინააღმდეგ.

"დიდ ბრიტანეთთან და საფრანგეთთან კოორდინირებული შეტევები, სრულად მოიცავს ჩვენს ნაციონალურ ძლიერებას: სამხედრო, ეკონომიკურ და დიპლომატიურ ძალას", - განაცხადა ტრამპმა.

ტრამპმა ასევე განაცხადა, რომ შეტევები გაგრძელდება იქამდე, სანამ სრულად არ განადგურდება ქიმიური იარაღის წარმოებისთვის საჭირო ინფრასტრუქტურა. ამავდროულად, ამერიკის პრეზიდენტმა აღნიშნა, რომ აშშ-ს არ აქვს სურვილი დიდი ხნის განმავლობაში დარჩეს სირიის ტერიტორიაზე. ტრამპი ასევე შეეხო რუსეთის საკითხს. აშშ-ს პრეზიდენტის თქმით, რუსეთმა ვერ შეასრულა 2013 წელს აღებული საერთაშორისო ვალდებულებები და ქიმიური იარაღის წარმოება სირიაში არ შემწყდარა.

სირიაში, BBC-ის კორესპონდენტი Twitter-ის საკუთარ გვერდზე აქვეყნებს შეტევის ამსახველ ნახევარწუთიან ვიდეოს.

შეტევები Tommahawk-ის ტიპის რაკეტებით განხორციელდა. ამ წუთისთვის არსებული ინფორმაციით, დაიბომბა სამი ლოკაცია. საუბარია სამეცნიერო კვლევით დაწესებულებაზე დამასკოში, სადაც დიდი ალბათობით ხდებოდა ქიმიური იარაღის წარმოება, ქიმიური იარაღის საწყობები ხომსის ბაზაზე და ასევე, ქიმიური შეიარაღებისა და ეკიპირების სამეთაურო ცენტრი ხომსის ბაზის მახლობლად. თვითმხილველების თქმით, დამასკოში აფეთქებების ხმა რამდენიმეჯერ გაისმა. მსხვერპლის შესახებ ინფორმაცია ჯერჯერობით არ ვრცელდება.

განხორციელებულ შეტევას უკვე გამოეხმაურა რუსეთის ელჩი აშშ-ში. რუსეთის საელჩოს გვერდი ტვიტერზე ელჩის განცხადებას ავრცელებს.

"წინასწარ დაწერილი სცენარი განხორციელებულია, კიდევ ერთხელ ჩვენ საფრთხის ქვეშ აღმოჩნდით. ჩვენ უკვე განვაცხადეთ, რომ მსგავს ქმედებებს უპასუხოდ არ დავტოვებთ. სრული პასუხისმეგბლობა ამაზე, ვაშინგტონს, ლონდონსა და პარიზს ეკისრება", - ნათქვამია აშშ-ში რუსეთის ელჩის, ანატოლი ანტონოვის განცხადებაში.

გასულ უქმეებზე, სირიის სამთავრობო ძალების მხრიდან ქალაქ დუმაში განხორციელებული ქიმიური შეტევის შედეგად 70 ადამიანი დაიღუპა, ხოლო დაახლოებით 500 საავადმყოფოებში ქიმიური ინტოქსიკაციის ნიშნებით მოხვდა.

ქიმიური იარაღის გამოყენების ფაქტი, დაადასტურა ჯანდაცვის მსოფლიო ორგანიზაციამაც.