ჯანდაცვის მსოფლიო ორგანიზაციის განცხადებით, სირიის ქალაქ დუმაში ქიმიური თავდასხმის შედეგად 43 ადამიანი დაიღუპა, ხოლო 500 მოიწამლა.

"დაახლოებით 500 ადამიანი მოხვდა სამედიცინო დაწესებულებებში, ქიმიური ინტოქსიკაციის სიმპტომებით. დაშავებულებს აღენიშნებოდათ, გულის და ცენტრალური ნერვული სისტემის მნიშვნელოვანი დარღვევებები", - ნათქვამია ორგანიზაციის განცხადებაში.

ქიმიური შეტევის დროს სხვადასხვა სამალავსა და სარდაფებში დაიღუპა 70 ადამიანი, აქედან 43 შემთხვევაში დაღუპვის მიზეზად ქიმიური ინტოქსიკაცია დასახელდა.

ორგანიზაცია მოითხოვს, მათ ექსპერტებს მიეცეთ შესაძლებლობა, ჩავიდნენ უშუალოდ ქალაქ დუმაში და ადგილზე აღმოუჩინონ დახმარება დაშავებულებს.

8 აპრილს სირიის ტერიტორიაზე განხორციელებულ ქიმიურ შეტევაში აშშ-მ და პარტნიორმა ქვეყნებმა სირიის პრეზიდენტი ბაშარ ასადი დაადანაშაულეს და განაცხადეს, რომ საპასუხო ზომებს მიიღებენ. ჯერჯერობით უცნობია სირიის ხელისუფლების მიმართ კონკრეტულად რა ზომებს მიიღებენ. აშშ-ის პრეზიდენტმა, დონალდ ტრამპმა მომხდარზე პასუხისმგებლობა პირადად ვლადიმერ პუტინსა და ირანის ხელისუფლებას დააკისრა.

თავის მხრივ რუსეთი უარყოფს ქიმიური შეტევის ფაქტს და მომხდარს ასადის მოწინააღმდეგე ბოევიკების მხრიდან ინსცენირებულ პროვოკაციას უწოდებს.

დაახლოებით, ერთი წლის წინ ასადის რეჟიმის მხრიდან ქიმიური იარაღის გამოყენებას, აშშ ავიაციის მიერ სირიის სამთავრობო ბაზების დაბომბვა მოყვა. მაშინ ქიმიურ შეტევას 84 ადამიანი შეეწირა.

ამავე თემაზე: