ერევანში, საფრანგეთის მოედანზე პოლიციამ დემონსტრანტები ისევ დააკავა. ამ დროისთვის სულ 60-ზე მეტი პირია დაკავებული. ინფორმაციას რადიო თავისუფლების ადგილობრივი ბიურო ავრცელებს.

ერევნის ქუჩებში მოსახლეობა ყოფილი პრეზიდენტის, სერჟ სარგსიანის პრემიერ-მინისტრად დანიშვნას აპროტესტებს. საპროტესტო მსვლელობა ბაგრამიანის მოედნიდან დაიწყო და ერევნის სახელმწიფო უნივერსიტეტთან დასრულდა, სადაც ოპოზიციონერმა ლიდერმა ნიკოლ პაშინიანმა სტუდენტებს პროტესტისკენ მოუწოდა.

სარგსიანის კანდიდატურას ერევანში რამდენიმედღიანი საპროტესტო აქცია მოჰყვა. მანიფესტაცია სომხეთში 13 აპრილს სარგსიანის მიერ როლის შეცვლის და პრეზიდენტიდან პრემიერ-მინისტრის პოსტზე გადასვლის გაპროტესტებით დაიწყო. დემონსტრანტები ერევნის ქუჩებში არჩევიდან მეორე დღესაც ქუჩაში არიან გამოსულები.

სარგსიანი პრეზიდენტად 2008 წელს აირჩიეს. ის ქვეყანას ორი ვადის განმავლობაში მართავდა და თანამდებობა 9 აპრილს დატოვა.

2015 წელს რეფერენდუმის შემდეგ პრეზიდენტის ძალაუფლების უმეტესი ნაწილი პრემიერ-მინისტრს გადაეცა, რომელსაც პარლამენტი ირჩევს. პარლამენტი ირჩევს ასევე პრეზიდენტსაც, რომელსაც საკონსტიტუციო ცვლილებების შედეგად სიმბოლური როლი აქვს. 9 აპრილს პრეზიდენტის პოსტზე სერჟს სარგსიანის პოლიტიკური მოკავშირე არმენ სარქისიანი დაამტკიცეს.

ერევნის ქუჩებში გამოსული მომიტინგეები ამბობენ, რომ არაძალადობრივ "ხავერდოვან რევოლუციას" იწყებენ.