რუსეთი ნატოს ვარშავის სამიტზე მიღებულ გადაწყვეტილებებს ეხმაურება და განმარტავს, რომ ჩრდილოატლანტიკური ალიანსი განაგრძობს საბრძოლო-პოლიტიკურ რეჟიმში არსებობას, საუბრობს აღმოსავლეთიდან მომდინარე იმ საფრთხეზე, რომელიც არ არსებობს და ახდენს რუსეთის დემონიზაციას.

რუსეთის საგარეო საქმეთა სამინისტროს წარმომადგენლის, მარია ზახაროვას განმარტებით, ნატო არა თანამედროვეობის გამოწვევების შესაბამისად, არამედ მშვიდობის შენარჩუნების ობიექტური ინტერესებისა და ევროპაში სტაბილურობის შენარჩუნებისა და ამ პროცესში ყველა საერთაშორისო მოთამაშის ჩართვის საწინააღდმეგოდ მოქმედებს. გარდა ამისა, მისი აზრით, ალიანსი თავისი ძალების კონცენტრირებას აღმოსავლეთიდან მომდინარე იმ საფრთხის საწინააღმდეგოდ ახდენს, რომელიც რეალურად არ არსებობს.

ზახაროვას თქმით, სამხრეთიდან მომდინარე უპრეცედენტო მასშტაბების ტერორისტული საშიშროებების ფონზე, ნატოს ფლანგების ქმედებები ადასტურებს, რომ ალიანსს ყურადღება მისი წევრი ქვეყნების უსაფრთხოებაზე არ აქვს კონცენტრირებული.

მისი განმარტებით, ნატოს მიერ საომარ ფარგლებში გადადგმული ნაბიჯების ფონზე რუსეთის დემონიზაცია, ალიანსისა და მისი ცალკეული მოკავშირეების კრიზისების პროვოცირების პროცესში დესტრუქციული როლიდან ყურადღების გადატანა და მსოფლიოს სხვადასხვა წერტილში მიმდინარე საომარი მოქმედებების მხარდაჭერა უპრეცედენტო ფორმებს აღწევს.

გარდა ამისა, ზახაროვა აღნიშნავს, რომ ყოველივე ზემოაღნიშნულის პარალელურად, ნატო იგნორირებას უკეთებს ევროატლანტიკური სისტემის უსაფრთხოების საკითხის, რომელმაც ვაშინგტონისა და ბრიუსელის მიერ არსებული ძალების ცვლილებები გამოიწვია, მათ შორის აშშ-სა და ნატოს დაჩქარებული რაკეტსაწინააღმდეგო გეგმების რეალიზაციის პროცესი ევროპაში.

ზახაროვას თქმით, 13 ივლისს, ნატოსა და რუსეთის საბჭოზე ეს უკანასკნელი ზემოაღნიშნულთან დაკავშირებით ალიანსის მუდმივი წარმოამდგენლებისგან დეტალურ განმარტებებს ელოდება.

ნატოს კომუნიკე: მოვუწოდებთ რუსეთს, გაიყვანოს ჯარები საქართველოდან