"იმედი მაქვს, რომ ამჯერად მაინც ქართული მხარე გამოხატავს პოლიტიკურ ნებას და დაიწყებს საკუთარი განცხადებების რეალიზებას", - ასე შეაფასა დე ფაქტო აფხაზეთის საგარეო საქმეთა მინისტრმა, დაურ კოვემ საქართველოს პრემიერ-მინისტრის, გიორგი კვირიკაშვილის რუსეთისადმი მიმართვა. ამის შესახებ მან ადგილობრივ სახელისუფლებო მედიასთან ისაუბრა.

"ჩვენ მივაქციეთ ყურადღება საქართველოს პრემიერმინისტრის მორიგ განცხადებას, რომელშიც ის მზადყოფნას გამოთქვამს დალაგდეს ურთიერთობა აფხაზეთთან და ოსეთთან. აუცილებლად აღსანიშნავია, რომ ეს არ არის პირველი მსგავსი შინაარსის განცხადება ქართული მხრიდან. პრობლემა იმაშია, რომ აქამდე არ გვინახავს რეალური ნაბიჯები, რომელიც ხელს შეუწყობს დიალოგის რეჟიმს და კონფლიქტის რეგულირებას", - აღნიშნა მან.

ჟურნალისტის კითხვაზე - მზადააა თუ არა აფხაზეთი საპასუხო ნაბიჯი გადადგას და საქართველოს ხელისუფლებასთან დიალოგი დაიწყოს - დაურ კოვემ უპასუხა, რომ ისინი აქამდეც იყვნენ ჩართული მოლაპარაკებებში და სამომავლოდაც მზადყოფნას გამოთქვამენ. მას მიაჩნია რომ ჟენევის მოლაპარაკებების ფორმატი უშედეგოა.

"ჟენევის მოლაპარაკებების დროს, არსებულ პრობლემებზე ჩვენ ვეჩეხებით სრულ მიუღებლობას ქართული მხრიდან. ისინი კატეგორიულად წინააღმდეგი არიან, რომ მივიღოთ ერთობლივი დოკუმენტი ძალის გამოუყენებლობის შესახებ. ჩვენი აზრით, მსგავსი დოკუმენტი გახდება კარგი საფუძველი ქართულ-აფხაზური მოლაპარაკებებისთვის და დაარეგულირებს აფხაზეთსა და საქართველოს შორის სახელმწიფო ურთიერთობის საკითხებს, რუსეთის ფედერაციის და სხვა საერთაშორისო აქტორების შუამდგომლობით."

საქართველოს პრემიერ-მინისტრმა გიორგი კვირიკაშვილმა რუსეთის ხელისუფლებას მოუწოდა, რომ რთული ვითარების დასაძლევად ერთობლივი ნაბიჯები გადადგან. კვირიკაშვილის თქმით, ქართული მხარე დაინტერესებულია რეალურ პროგრეს მიაღწიონ ჟენევის საერთაშორისო დისკუსიების პროცესში. ასევე, მზადაა პირდაპირი დიალოგისათვის აფხაზებთან და ოსებთან. ამ თვალსაზრისით, პრემიერი მიესალმება რუსეთის კონსტრუქციულ მიდგომასაც.