შინაგან საქმეთა სამინისტროს განცხადებით, ტრანსგენდერი ქალის, მირანდა ფაღავას მიმართ დისკრიმინაციული მოტივით ჩადენილი ძალადობის ბრალდებით, მოსამართლის განჩინების საფუძველზე, 1986 წელს დაბადებული პირი დააკავეს.

ბრალდების მხარე აცხადებს, რომ 2018 წლის 28 იანვარს, გამთენიისას, თბილისში, ი.ჭავჭავაძის გამზირზე, 1986 წელს დაბადებულმა ბ.ო.-მ დისკრიმინაციული მოტივით, სექსუალური ორიენტაციის ნიშნით, ფიზიკური შეურაცხყოფა მიაყენა მ.ო.-ს.

გამოძიება საქართველოს სსკ-ს 126-ე მუხლის 1-ლი ნაწილით მიმდინარეობს, რაც ძალადობას გულისხმობს.

ტრანსგენდერი ქალი მირანდა ფაღავა აცხადებს, რომ 28 იანვარს დაახლოებით 04:00-დან 05:30 საათამდე ვაკის პარკის მიმდებარე ტერიტორიაზე მისთვის უცნობმა პირმა სცემა. ფაღავა ჰყვება, რომ მარკეტში ფულის დასახურდავებლად შესვლისას უცხო პირმა დაუძახა და მასთან მისვლა სთხოვა. მისივე თქმით, თხოვნა დაჟინებულ მოთხოვნაში გადაიზარდა, შემდეგ კი ბრაზსა და ყვირილში. ფაღავა ფეისბუქის საკუთარ გვერდზე წერს, რომ კაცმა მიახლოებისთანავე დაარტყა, შემდეგ კი გინებისა და ტრანსფობიური შეძახილების ფონზე, მარკეტის შესასვლელში მდგარი რკინის დაფა აიღო და რამდენჯერმე ჩაარტყა.