პრემიერმინისტრ გიორგი კვირიკაშვილის გადაწყვეტილებით, თბილისის ყოფილი მერის, დავით ნარმანიას მოადგილე ირაკლი ლექვინაძე ბიზნესომბუდსმენად დაინიშნა.

"ის იქნება ძალიან მნიშვნელოვანი რგოლი ბიზნესსა და ხელისუფლებას შორის ურთიერთობაში. არის ძალიან წესიერი ადამიანი, კარგი პროფესიონალი და დარწმუნებული ვარ, რომ ამ მიმართულებას, რომელიც არის ძალიან მნიშვნელოვანი და იმ კარგ ტრადიციას, რომელიც ამ სამსახურში შეიქმნა, ირაკლი გააგრძელებს და ის იქნება ბიზნესის ხმა ხელისუფლებაში. ნამდვილად უნდა ითქვას, რომ ჩვენი ხელისუფლების პირობებში გახდა, სწორედ, ეს ინსტიტუტი ძალიან ეფექტური. მინდა, მას წარმატება ვუსურვო", - თქვა გიორგი კვირკაშვილმა დღეს გამართულ მთავრობის სხდომაზე.

პროფესიით ეკონომისტი ირაკლი ლექვინაძე დავით ნარმანიას მოადგილედ მუშაობდა და აღნიშნული პოსტი ადგილობრივი თვითმმართველობის არჩევნების შემდეგ დატოვა. თავად ნარმანიამ საქმიანობა ენერგეტიკისა და წყალმომარაგების ეროვნულ კომისიაში გააგრძელა.