10 მარტს თბილისის სახელმწიფო უნივერსიტეტში სენატის სხდომა უნდა გამართულიყო, რომელზეც აკადემიურ საბჭოს კანცლერის თანამდებობაზე გიორგი გაფრინდაშვილის კანდიდატურა უნდა წარედგინა.

ამის პარალელურად მოძრაობამ სტუდენტები განათლების პოლიტიკის წინააღმდეგ სხვა სტუდენტებთან ერთად თსუ-ს პირველი კორპუსის შესასვლელში აქცია გამართა, რომელზეც მათ გიორგი გაფრინდაშვილის კანდიდატურის მოხსნა და სენატის სხდომაზე დასწრება მოითხოვეს.

სტუდენტების აქციის პარალელურად თსუ-ს პირველ კორპუსში პოლიცია მობილიზდა

ფოტო: თამარა ღამბაშიძე / On.ge

უნივერსიტეტის შენობაში პოლიცია მობილიზდა. მოგვიანებით სტუდენტებმა იმ დარბაზისკენ გადაინაცვლეს, რომელშიც სხდომა და არჩევნები უნდა ჩატარებულიყო, თუმცა პოლიციამ ისინი დარბაზში არ შეუშვა.

სტუდენტ ლევან ლორთქიფანიძის თქმით, მოვლენები უნივერსიტეტის წესდებას ეწინააღმდეგებოდა:

"უნივერსიტეტის წესდების მიხედვით, სენატის ყველა სხდომა ღიაა, თუ მასზე სახელმწიფო საიდუმლოება არ განიხილება. სენატის სხდომაზე დასწრების უფლება ყველა სტუდენტს აქვს".

სტუდენტები ითხოვდნენ განმარტებას, თუ რატომ არ უშვებდნენ მათ სენატის სხდომაზე:

"ჩვენს კუთვნილ უნივერსიტეტში, სადაც პროცესები ჩვენ უნდა ვმართოთ, ძალადობრივად გვეწინააღმდეგებიან და არ გვიშვებენ სხდომაზე, როცა გვინდა კონსტრუქციული საუბარი. მოვუწოდებ დაცვას, სწორი მხარე აარჩიოს".

თსუ-ს სტუდენტები უნივერსიტეტის პოლიციური რეჟიმისგან გათავისუფლებას მოითხოვენ. 10 მარტი, 2016 წელი.

ფოტო: თამარა ღამბაშიძე / On.ge

მოგვიანებით სტუდენტებმა პოლიციის კორდონი გაარღვიეს და იმ აუდიტორიის შესასვლელი დაიკავეს, სადაც სენატის სხდომა უნდა გამართულიყო. სხდომა ჩაიშალა.

მოგვიანებით სენატის რამდენიმე წევრმა და თსუ-ის პროფესორებმა სტუდენტებს მხარდაჭერა გამოუცხადეს. მათ შორის იყვნენ მანანა შამილიშვილი, მარი წერეთელი, თამაზ ჯოლოგუა, ლელა გაფრინდაშვილი და სხვები. სენატის წევრებმა აღნიშნეს, რომ ისინი გიორგი გაფრინდაშვილის კანდიდატურას მხარს არ დაუჭერდნენ და მას კანდიდატურის მოხსნისკენ მოუწოდეს.

თსუ-ს სტუდენტებმა დაიკავეს იმ აუდიტორიის შესასვლელი, სადაც სენატის სხდომა უნდა გამართულიყო. 10 მარტი, 2016 წელი.

ფოტო: On.ge

თსუ-ს სტუდენტებს პროფესორი თამაზ ჯოლოგუა შეუერთდა

ფოტო: On.ge

გიორგი გაფრინდაშვილი წლების წინ თსუ-ის თვითმმართველობის წევრი იყო. 2011 წელს, სტუდენტურ პროექტ "თარგმნეს" პრეზენტაციაზე თვითმმართველობის წევრებსა და მოძრაობის აქტივისტებს შორის ფიზიკური დაპირისპირება მოხდა, რის შემდეგაც რამდენიმე სტუდენტი დაზარალდა. ადგილზე მისულ ჟურნალისტებს სიტუაციის გარკვევისას გიორგი გაფრინდაშვილმა უთხრა, რომ არავინ არავის სცემდა.