დღეს, თბილისის საქალაქო სასამართლოში პროევროპულ აქციებში მონაწილეობისთვის დაკავებული პოეტი ზვიად რატიანის წინასასამართლო სხდომა გაიმართა — მოსამართლე ლელა კალაჩენკომ ის პატიმრობაში დატოვა.

დღევანდელ სასამართლო პროცესზე დაცვის მხარემ აღმკვეთი ღონისძიების სახით 10 000 ლარის გირაო მოითხოვა. ბრალდების მხარე რატიანის თავისუფლების აღკვეთას ითხოვდა. პროკურატურის განმარტებით რატიანზე ახალი დანაშაულის ჩადენის და მოწმეებზე ზემოქმედების საშიშროება არსებობს. პროკურატურამ წინა სასამართლო სხდომაზეც იმავე მიზეზები დაასახელა ბრალდებულის პატიმრობაში დატოვების, რაზეც რატიანმა განაცხადა, რომ საქმეში მოწმეებად მხოლოდ სამართალდამცავები არიან.

"ზვიად რატიანის პატიმრობაში დატოვება აბსტრაქტულ საფრთხეებზე მითითებით ტოვებს შთაბეჭდილებას, რომ სადამსჯელო ხასიათი აქვს ყველაზე მკაცრი ღონისძიების გამოყენებას," — თქვა ზვიად რატიანის ადვოკატმა.(ტექსტი "პუბლიკა")

ზვიად რატიანმა განაცხადა, რომ მისი პოლიციელისადმი გაწნული სილა იმ უსამართლობას ეძღვნებოდა, რაც მზია ამაღლობელმა და ნინო დათაშვილმა იწვნიეს სისტემისგან და სასამართლო დარბაზში მყოფ მანდატურს მიმართა, რომელმაც ნინო დათაშვილზე ფიზიკურად იძალადა.

"არა მგონია ბევრი ახნა სჭიდებობეს იმას, რაც გავაკეთე და რატომაც გავაკეთე და რაც დასჭირდება, იმას დასკვნითი სიტყვისთვის შემოვინახავ. ახსენა ჩემმა ადვოკატმა სიმბოლურობა. დიახ, რა თქმა უნდა, ეს იყო ყველაზე უმტკივნეულო, მინიმალურად მტკივნეული სიმბოლური საქციელი, ყველაზე განზოგადებადი. ყველა მოძალადე პოლიციელმა, ხელისუფლების, სასამართლოს ყველა წარმომადგენელმა, ვინც ამ უსამართლობაშია ჩართული, უნდა მიიღოს თავის თავზე. ჩემს ბუნებაში არ ზის ტკივილის მიყენება. ბიძინა ივანიშვილით დაწყებული, ეს არის სილა ყველასთვის. [...]

როცა ვსაუბრობდი სიმბოლოებზე, რომ ეს სილა სწორედ მას უნდა მიეღო... ერთ-ერთი მოძალადე ბექა [სადრაძე] და ჩემი ერთ-ერთი მთავარი ინსპირაცია გახდა და მიზეზი იყო ქალბატონი მზია ამაღლობელის და ქალბატონი ნინო დათაშვილის საქმე და ის ძალადობა რაც მათ მიმართ განხორციელდა და მათ შორის ძალიან ეამაყება ალბათ თავისი საქციელი. ეს სილა იქცევა ძალიან დიდ სილად" — განაცხადა რატიანმა.

მოსამართლე ლელა კალიჩენკომ, რომელმაც ნინო დათაშვილი პატიმრობაში დატოვა რატიანს უპასუხა, რომ უსამართლობის დაფიქსირების შემთხვევაში შესაბამისი ორგანოებისთვის მიემართა.

"სათანადო ორგანოებისთვის მიმართული აქვს უამრავ ადამიანს, მათ შორის მეც წლების მანძილზე და ქალბატონო, არ ვიცი, რამდენი ხართ, ვისაც ასეთ საქმეებს განდობენ, მაგრამ მარტო ერთმანეთსღა ეძახით მოსამართლეებს," — უპასუხა რატიანმა.

ზვიად რატიანს ბრალი საქართველოს სისხლის სამართლის კოდექსის 353(1)-ე მუხლით წარუდგინეს (პოლიციის, სპეციალური პენიტენციური სამსახურის თანამშრომლის ან სხვა სახელმწიფო ორგანოს წარმომადგენელზე თავდასხმა), რაც ოთხიდან შვიდ წლამდე თავისუფლების აღკვეთას გულისხმობს.