თუ დღეს Facebook-ში შესვლისას მეტამ მოგთხოვათ მაღალი დაცვის (Advanced Protection, ადრე ცნობილი იყო როგორც Facebook Protect) ჩართვა, თქვენ მარტო არ ხართ. სხვა მომხმარებლები იმავე შეტყობინებას იღებენ და ფიქრობენ — ხომ არ დაებლოკათ ანგარიში ან ხომ არ დაკარგეს ის.

ვინაიდან მეტას ოფიციალური განცხადება ამის თაობაზე არ გაუვრცელებია, მოდი, ვცადოთ, ჩვენი ძალებით გავარკვიოთ რა ხდება, რატომ იღებთ ამ შეტყობინებას ახლა და რა უნდა გააკეთოთ.

რა არის მაღალი დაცვა?

მაღალი დაცვა არის მეტას უსაფრთხოების პროგრამა. პირველად 2018 წელს გაეშვა, რათა პოლიტიკოსების, აქტივისტების, ჟურნალისტებისა და სხვა მაღალი რისკის მქონე ანგარიშები ჰაკერებისგან დაეცვა. მოგვიანებით პროგრამა გაფართოვდა და 2024 წელს სახელიც გადაერქვა.

მისი მთავარი ფუნქციაა ორი-ფაქტორიანი ავტორიზაცია (2FA) — ანუ ანგარიშში შესასვლელად დაგჭირდებათ დამატებითი კოდი (აპლიკაციიდან, SMS-ით ან უსაფრთხოების გასაღებით). თუ ამ დაცვას არ ჩართავთ, მეტამ შესაძლოა დროებით დაგბლოკოთ, სანამ ორეტაპიან დაცვას არ გაააქტიურებთ.

რატომ მიიღო ბევრმა ადამიანმა ეს შეტყობინება დღეს?

მიუხედავად იმისა, რომ მეტას ახალი ოფიციალური განცხადება არ გაუკეთებია, რამდენიმე მიზეზი არსებობს, რის გამოც შეგვიძლია ვივარაუდოთ — რატომ დღეს:

ფეისბუქი ხშირად უშვებს მაღალ დაცვას ტალღებად. ახლა შეიძლება მას ახალი კრიტერიუმები დაემატა და სწორედ ამიტომ ერთბაშად უფრო ბევრმა მომხმარებელმა მიიღო გაფრთხილება.

ასევე, ფეისბუქის სისტემა ავტომატურად ამოწმებს, რომელი ანგარიშებია მაღალი რისკის. თუ წესები გამკაცრდა, ათასობით მომხმარებლისთვის ერთდროულად შეიძლებოდა გაეგზავნა მოთხოვნა, რისკების დასაზღვევად.

მეტა ხშირად ჩუმად ავრცელებს პროგრამას ქვეყნის მიხედვით. თუ ერთ რეგიონში ბევრმა მიიღო ეს შეტყობინება, დიდი ალბათობით ეს ადგილობრივი ტალღაა და არა გლობალური.

კიდევ, უნდა გავიხსენოთ, რომ არჩევნების წინ მეტა აძლიერებს ხოლმე უსაფრთხოებას, რათა თავიდან აიცილოს ჰაკინგი და დეზინფორმაცია. თუ ქვეყანაში არჩევნები მოახლოვდა, დღევანდელი ტალღა შეიძლება სწორედ ამას უკავშირდებოდეს.

ასევე არის ვარიანტი, რომ თქვენ ფეისბუქზე საჯარო პროფილი გაქვთ, ან დიდ აუდიტორიასთან წვდომის პოტენციური შანსი. ასეთ ანგარიშებს მეტა პირდაპირ აიძულებს მაღალი დაცვის ჩართვას, რათა ანგარიშებთან წვდომა უფრო დაცული იყოს.

რაც მთავარია: ეს არ არის ანგარიშის გატეხვა და არც თაღლითობა

თუ შეტყობინებას ხედავთ პირდაპირ ფეისბუქის აპში ან ბრაუზერში, ეს რეალურია. უბრალოდ ფრთხილად იყავით ელფოსტებთან — უცნობ ბმულებზე არ დააჭიროთ.

გადადით ჩვეულებრივ ფეისბუქში და შეამოწმეთ:
Settings → Security and Login → Advanced Protection.

არ ინერვიულოთ. ეს არის ფეისბუქის სტანდარტული უსაფრთხოების ნაბიჯი, და არ ნიშნავს, რომ თქვენი ანგარიში გატეხილია.

ჩართეთ მაღალი დაცვა. ორეტაპიანი ავტორიზაციისთვის უმჯობესია გამოიყენოთ ავტორიზაციის სანდო აპლიკაცია, რომელიც ყოველჯერზე, როცა დაგჭირდებათ, დაგიგენერირებთ და მოგცემთ 6-ციფრა ერთჯერად კოდს (მაგ., Google Authenticator ან Authy). SMS-იც მუშაობს, თუმცა ნაკლებად დაცულია.

ფრთხილად იყავით ელფოსტებთან. თუ ელფოსტა მოგივიდათ, ბმულებზე ნუ დააჭერთ — პირდაპირ ფეისბუქში შედით და იქ გადაამოწმეთ. თუ შეტყობინებას ხედავთ, მაღალი დაცვის ჩართვა დაგიცავთ ჰაკერებისგან და უზრუნველყოფს, რომ თქვენი ანგარიშის წვდომას არ დაკარგავთ.