პარტნიორობა კარგი მმართველობის პროგრამის ფარგლებში, 2015-2017 წლებში, საქართველოში ევროკავშირისა და ევროპის საბჭოს დაფინანსებული რვა პროექტი განხორციელდა, რომელთა ბიუჯეტმაც 3,7 მილიონი ევრო შეადგინა. ადგილობრივი პროექტების გარდა საქართველომ მონაწილეობა მიიღო 14 რეგიონალურ ინიციატივაში.

დღეს, 3 ნოემბერს, ევროკავშირის წარმომადგენლობამ და ევროპის საბჭომ საქართველოში განხორციელებული ერთობლივი პროექტების შედეგები წარადგინეს.

პროექტები შეეხებოდა:

  • ადამიანის უფლებათა ევროპული კონვენციის გამოყენებას;
  • ეროვნული უმცირესობების სამოქალაქო ინტეგრაციას;
  • საქართველოს ადვოკატთა ასოციაციის ხელშეწყობას;
  • ციხეებში ჯანდაცვის გაუმჯობესებას;
  • ფულის გათეთრების წინააღმდეგ ბრძოლას;
  • მედიის თავისუფლების პროფესიონალიზმისა და პლურალიზმის ხელშეწყობას;
  • ინტერნეტ თავისუფლების დაცვასა და არჩევნების მხარდაჭერას.

ერთობლივი პროექტების შედეგების მიხედვით, 1300-ზე მეტმა იურისტმა გაიღრმავა ცოდნა ადამიანის უფლებათა ევროპული კონვენციის სხვადასხვა დებულებებისა და ევროსასამართლოს პრეცედენტული სამართლის მიმართულებით. განახლდა ელექტრონული საგამოცდო პროგრამა, რომელიც უზრუნველყოფს ადვოკატთა საკვალიფიკაციო გამოცდების ელექტრონულად ჩატარებას. 100-ზე მეტ სტუდენტს ჩაუტარდა ტრენინგი მედიის ანგარიშგებაში. სამართლებრივი მხარდაჭერა გაუწიეს 2016 წლის ოქტომბრის საპარლამენტო და 2017 წლის სექტემბრის ადგილობრივ არჩევნებს. გაძლიერდა ბრძოლა ფულის გათეთრების წინააღმდეგ, რომელიც 2018 წელსაც გაგრძელდება.

საგარეო საქმეთა მინისტრის მოადგილემ, დავით ზალკალიანმა შეხვედრაზე აღნიშნა, რომ პროექტების განხორციელების განმავლობაში საქართველო უახლოვდებოდა იმ სტანდარტებს, რომელსაც ითვალისწინებს ევროკავშირი და ევროსაბჭო:

"საქართველოს აქვს ხელშესახები შედეგები ბოლო პერიოდის განმავლობაში, როგორიც არის საერთაშორისო თანამეგობრობის აღიარება და ის ფაქტი რომ საქართველო ღია მმართველობის ორგანიზაციის თავმჯდომარე გახდა".

2014 წლის აპრილში ევროკავშირი და ევროპის საბჭო შეთანხმდნენ ევროკავშირის აღმოსავლეთ პარტნიორობის ქვეყნებთან მიზნობრივი თანამშრომლობის ღონისძიებების განხორციელებაზე, ევროპულ სტანდარტებთან დასაახლოვებლად.