დიდ ბრიტანეთში 16-17 წლის მოზარდებისთვის სოციალურ მედიაზე ღამის საათებში შეზღუდვის დაწესებას გეგმავენ. ახალი წესების მიხედვით, Instagram, TikTok და YouTube მათთვის შუაღამიდან დილის 06:00 საათამდე ავტომატურად მიუწვდომელი იქნება, თუმცა მომხმარებლებს ამ ფუნქციის გამორთვა ანგარიშის პარამეტრებიდან შეეძლებათ. კანონპროექტის პარლამენტში წარდგენას 2026 წლის ბოლომდე გეგმავენ.

მთავრობას ასევე სურს, მოზარდების ანგარიშებზე ავტომატურად გამოირთოს ისეთი "დამოკიდებულების გამომწვევი" ფუნქციები, როგორებიც ვიდეოების ავტომატური ჩართვა და უსასრულო სქროლია. ხელისუფლების განცხადებით, ეს ზომები მოზარდებს კონცენტრაციის გაუმჯობესებაში, უკეთ დაძინებასა და ოჯახთან მეტი დროის გატარებაში დაეხმარება.

ფოტო: Getty Images

ინიციატივას ყველა არ ეთანხმება. ელენ რუმი, რომლის აზრითაც მისი 14 წლის შვილი, ჯულს სვინი, 2022 წელს ინტერნეტგამოწვევის შედეგად დაიღუპა, მიიჩნევს, რომ შეზღუდვა საკმარისად მკაცრი არ არის, რადგან მოზარდებს მისი მარტივად გამორთვა შეეძლებათ.

"ეს ჰგავს იმას, 17 წლის მოზარდს ალკოჰოლის ბოთლი მისცე, შემდეგ კი ოდნავ მოშორებით დაუდო. მას მაინც შეეძლება, ბოთლი ისევ თავისკენ მოსწიოს", — თქვა მან ერთ-ერთ ინტერვიუში.

ამ ახალი ინიციატივის შესახებ მას შემდეგ გამოცხადდა, რაც ივნისში ცნობილი გახდა, რომ დიდ ბრიტანეთში 16 წლამდე ბავშვებს რამდენიმე სოციალური პლატფორმის გამოყენება სრულად აეკრძალებოდათ.

ონლაინუსაფრთხოების მინისტრმა, კანიშკა ნარაიანმა, კანონპროექტს მხარი დაუჭირა და განაცხადა, რომ ღამის შეზღუდვისა და ავტომატური ფუნქციების გათიშვის ერთობლიობით დიდი ბრიტანეთი ტექნოლოგიური კომპანიების რეგულირების მხრივ მსოფლიოში ერთ-ერთი ყველაზე მკაცრი ქვეყანა გახდება.

მთავრობა ამ ეტაპზე VPN-ების შეზღუდვას არ გეგმავს და აცხადებს, რომ ბავშვები მათ ასაკობრივი კონტროლის გვერდის ასავლელად ფართოდ არ იყენებენ.

300 მოზარდზე ჩატარებულმა კვლევამ აჩვენა, რომ ღამის შეზღუდვამ შესაძლოა ძილის ხარისხი გააუმჯობესოს, თუმცა ექსპერტების თქმით, ეს საკითხის მხოლოდ ერთი ნაწილია.