1 495 დღის განმავლობაში, უკრაინელი ჯარისკაცი და ქალაქ მარიუპოლის ერთ-ერთი მცველი, 32 წლის ოლეკსანდრ ივანოვი, რუსულ კოლონიაში იყო დაპატიმრებული. ივანოვი 2022 წლის გაზაფხულზე ტყვედ ჩავარდა და მას შემდეგ, ბეტონის მომცრო საკანში დატუსაღებულს, გარე სამყაროზე არანაირი ინფორმაცია არ ჰქონია: რა ხდებოდა თავის სამშობლოში, ცოცხლები თუ იყვნენ მისი ცოლი და მცირეწლოვანი შვილი... მძიმე და ხანგრძლივი ოთხი წლის შემდეგ, 15 მაისს, ტყვეთა გაცვლის შეთანხმებით, ოლეკსანდრი უკრაინას და თავის ოჯახს დაუბრუნდა და ახლა იხსენებს, როგორ გადაიტანა ყველაზე რთული დღეები.

ოლეკსანდრ ივანოვი ოჯახთან ერთად

ფოტო: Oleksandr Ivanov

ოლეკსანდრმა ერთ დღეს თავის თანამესაკნეებს უთხრა, რომ ჰარი პოტერის ფანი იყო და შესთავაზა, ჯადოსნური სამყაროს ისტორია მათთვის მოეყოლა, რადგან წიგნები იმდენჯერ ჰქონდა წაკითხული, ლამის ზეპირადაც კი იცოდა. პატიმრები შეთავაზებას დათანხმდნენ და ივანოვს მოუწია, საგის შვიდივე ტომი ზედმიწევნით გაეხსენებინა. უკრაინის მცველი თანამესაკნეებს დღეში ზოგჯერ ექვსი-შვიდი საათის განმავლობაში ჩურჩულით უყვებოდა პოტერიადას და თხრობას ყველაზე დრამატულ მომენტში წყვეტდა ხოლმე, რათა ყველას ერთი სული ჰქონოდა, გაეგო, როგორ გაგრძელდებოდა ამბავი. როგორც კი შესაძლებლობა ისევ ჩნდებოდა, ბიჭები მთხოვდნენ, მოყოლა გამეგრძელებინაო, იხსენებს ივანოვი.

ივანოვის ცოლი, ნელი, რომელიც ქმრის მსგავსად ჯარში მსახურობს და ჰარი პოტერის გულმხურვალე ფანია, იხსენებს, როგორ შეიტყო ამ ამბავზე: "ხმები რომ მომივიდა, ჰარი პოტერს ჰყვებაო, სულ არ გამკვირვებია, მაგრამ გამიხარდა, ესე იგი, სიმხნევე არ დაუკარგავს და ყველაფერი ძალიან ცუდადაც არაა-მეთქი".

ჰარი პოტერზე ოლეკსანდრს მეექვსე კლასში, 2005 წელს გაუგია. მაშინ იგი საბავშვო ტელეკონკურსში მონაწილეობდა, სადაც თემად ჰარი პოტერი შეხვდა. და მართალია, ამ არჩევანმა იგი კონკურსს პირველივე ტურიდან გამოთიშა, ჯოან როულინგის შექმნილი ჯადოსნური სამყარო მისი ცხოვრების სიყვარულად იქცა.

მეექვსეკლასელი ოლეკსანდრი (მეორე რიგში ყველაზე მარჯვნივ) ტელეშოუში ყველაზე ჭკვიანი. გადაცემის წამყვანი დღეს უკვე კრემლის პროპაგანდისტი თინა კანდელაკი იყო.

ფოტო: Oleksandr Ivanov

ჰოგვორტსში მოგზაურობამ კი ტყვეობისას მხოლოდ თანამესაკნეებთან როდი დააახლოვა. ივანოვი იხსენებს, რომ როცა რუსმა ბადრაგებმა მის სხეულზე ჰარი პოტერის ტატუები შენიშნეს, რამდენიმემ "მისხალი ადამიანობა" გამოიჩინა და ნორმალურად დაელაპარაკა.

პოტერიადის ერთ-ერთი სიმბოლოს, დიდგულას ჯოხის, ტატუ ოლეკსანდრის მკლავზე

ფოტო: Oleksandr Ivanov

გათავისუფლების შემდეგ, ოლეკსანდრს მონატრებული ოჯახი სწორედ პოტერიადის სამყაროს საჩუქრებით დახვდა, მათ შორის, ჯადოსნური ჯოხით, ბუთი და ელფ დობის წინდით. საჩუქრები და ათასობით გამამხნევებელი წერილი მარიუპოლის პოტერჰედმა მცველმა უცნობი ადამიანებისგანაც მიიღო.

"სიტყვებით ვერ გადმოვცემ, ეს რამდენს ნიშნავს ჩემთვის. ყველას მადლობელი ვარ", — აღნიშნავს ივანოვი, — "მეამაყება, რომ ამ ქვეყნის ნაწილი ვარ".