სახელმწიფო უსაფრთხოების სამსახურის ინფორმაციით, პანკისის ხეობის სოფლებში ტერორისტული ორგანიზაცია "ისლამური სახელმწიფოს" წევრი საქართველოს სამი მოქალაქე დააკავეს.

უწყების ინფორმაციით, დაკავებული პირები ტერორისტულ ორგანიზაცია "ისლამური სახელმწიფოს" რიგებში გაერთიანდნენ და ტერორისტული საქმიანობის განხორციელების მიზნით, უცხო ქვეყნიდან იღებდნენ გარკვეულ მითითებებს.

საგამოძიებო მოქმედებების შედეგად ათეულობით ცეცხლსასროლი იარაღი, ასაფეთქებელი ნივთიერება, საბრძოლო მასალა, ტერორისტული ორგანიზაციის დროშა და მათი სიმბოლიკის ამსახველი ნივთები ამოიღეს.

"კონტრტერორისტული ცენტრისა და სპეციალური ოპერაციების დეპარტამენტის თანამშრომლებმა, გასულ ღამეს პანკისის ხეობის სოფლებში — ომალოში, ბირკიანსა და ჯოყოლოში ჩატარებული მასშტაბური ღონისძიებების შედეგად, უცხო ქვეყნის ტერორისტულ ორგანიზაციაში გაერთიანებისა და ტერორისტულ საქმიანობაში დახმარების მუხლით მიმდინარე გამოძიების ფარგლებში, საქართველოს სამი მოქალაქე დააკავეს.

გამოძიებით დადგინდა, რომ დაკავებული პირები გაერთიანდნენ ტერორისტულ ორგანიზაცია "ისლამური სახელმწიფოს" რიგებში და ტერორისტული საქმიანობის განხორციელების მიზნით, უცხო ქვეყნიდან იღებდნენ გარკვეულ მითითებებს.

ისინი პანკისის ხეობაში ტერორისტული ორგანიზაციის მხარდამჭერი, ეგრეთ წოდებული, "ჯამაათის" ჩამოყალიბებას და ტერორისტულ საქმიანობაში სხვა პირების ჩართვას ცდილობდნენ. რისთვისაც სხვადასხვა ლოკაციაზე აწყობდნენ ფარულ, კონსპირაციულ შეხვედრებს და ეწეოდნენ ტერორისტული იდეოლოგიის პროპაგანდას.

მიმდინარე გამოძიების ფარგლებში, მოსამართლის განჩინების საფუძველზე, დაკავებულებისა და მათთან შემხებლობაში მყოფი სხვა პირების მიმართ მიმდინარეობდა ფარული საგამოძიებო მოქმედებები და ტარდებოდა შესაბამისი სამართლებრივი ოპერატიულ-სამძებრო ღონისძიებები.

საგამოძიებო მოქმედებების შედეგად ამოღებულია რამდენიმე ერთეული ცეცხლსასროლი იარაღი, ასაფეთქებელი ნივთიერება, საბრძოლო მასალა, მობილური ტელეფონები, კომპიუტერული ტექნიკა და სხვა ელექტრონული ინფორმაციის მატარებელი მოწყობილობები. ასევე ტერორისტული ორგანიზაცია "ისლამური სახელმწიფოს" დროშა, მათ სიმბოლიკის ამსახველი ნივთები და პირადი დოკუმენტები," — განაცხადა უწყებამ.

გამოძიება საქართველოს სისხლის სამართლის კოდექსის 328-ე და 326-ე მუხლებით მიმდინარეობს. დანაშაული სასჯელის სახით 10-დან 17 წლამდე თავისუფლების აღკვეთას ითვალისწინებს.