Pink Floyd-მა მილანის ინტერთან და Sony Music Italy-სთან ერთად სამოსის ახალი ხაზი გამოუშვა, რომელიც Wish You Were Here-ის 50 წლის იუბილეს აღნიშნავს. კოლაბორაცია მიზნად ისახავს ნახევარი საუკუნის აღნიშვნას მას შემდეგ, რაც პროგრესივ-როკის გიგანტებმა გამოუშვეს თავიანთი საკულტო მეცხრე სტუდიური ალბომი, რომელშიც შედიოდა სიდ ბარეტისადმი მიძღვნილი კომპოზიცია Shine On You Crazy Diamond, Have A Cigar და სხვა.

შექმნილია ექსკლუზიური პროდუქტების ხაზი, რომლის მთავარი ნაწილია PFFC (Pink Floyd Football Club) კაფსულა. ეს კოლექცია შთაგონებულია ბენდის მიერ 70-იან წლებში დაარსებული საფეხბურთო გუნდით, რომელშიც დევიდ გილმორი, როჯერ უოტერსი, ნიკ მეისონი და რიჩარდ რაიტი ტურნეების შესვენებისას თამაშობდნენ. დიზაინი ეყრდნობა კიმ გოტლიბ-უოკერის მიერ გადაღებულ ისტორიულ ფოტოს და აცოცხლებს 70-იანების ესთეტიკას: სამოსს აქვს ორიგინალური შრიფტი და ალბომის საიუბილეო ლოგო, რომელიც სპეციალურად კლუბისთვის ადაპტირდა.

პინკ ფლოიდის და მილანის ინტერის კოლაბორაცია

ფოტო: NME

კოლექციის გამორჩეული ნივთებია:

  • "ჰიმნის ქურთუკი": სულ გამოვიდა 400 დანომრილი ეგზემპლარი. სწორედ ამ ქურთუკებს მოირგებენ ნერაძურის ფეხბურთელები 17 აპრილს, კალიარისთან მატჩის წინ;
  • სპეციალური ნაკრები: მოიცავს ორიგინალურ მაისურსა და ექსკლუზიურ ლურჯ ვინილს;
  • აქსესუარები: ფორმებისა და მაისურების გარდა, ხელმისაწვდომია შარფები, ჩანთები, გიტარის მედიატორები და დრამის ჯოხები;

"ეს კოლაბორაცია სრულად გამოხატავს ჩვენს ხედვას: ვაქციოთ ინტერის ბრენდი ისეთ პლატფორმად, რომელიც სხვადასხვა სამყაროებთან ნამდვილ კავშირებს ამყარებს", — განაცხადა ლუკა ადორნატომ, კლუბის მარკეტინგის დირექტორმა. მისი თქმით, Pink Floyd-თან თანამშრომლობა მათი ევოლუციის უმნიშვნელოვანესი ეტაპია.

ყველა პროდუქტი უკვე ხელმისაწვდომია ინტერის ოფიციალურ ონლაინ მაღაზიაში და მილანის ფიზიკურ მაღაზიებში, ხოლო სპეციალური ნაკრები 30 აპრილიდან Sony Music Italy-ს პლატფორმაზეც გამოჩნდება.

აღსანიშნავია, რომ საიუბილეო გამოცემის წარმატების წყალობით, Pink Floyd გახდა არტისტი, რომელსაც ყველაზე ხანგრძლივი პერიოდი (50 წელზე მეტი) აშორებს პირველ და ბოლო "ნომერ პირველ" ალბომს შორის. იუბილეს ფარგლებში ასევე გაიხსნა Pop-up მაღაზიები, ნოელ ფილდინგმა შექმნა სიდ ბარეტით შთაგონებული ნახატები, ხოლო შობის წინ ბენდმა სიმღერის Wish You Were Here ახალი მუსიკალური ვიდეოც გაავრცელა.

მსგავსი ამბები: