9 თებერვლით დათარიღებული მთავრობის დადგენილებით, რომელსაც ხელს ირაკლი კობახიძე აწერს, ცვლილებები შევიდა "საქართველოს საჰაერო სივრცის სტრუქტურისა და დიზაინის წესის დამტკიცების შესახებ" 2018 წლის 28 დეკემბრის მთავრობის დადგენილებაში. დოკუმენტის მიხედვით ქვეყნის საფრენოსნო არეალი ხელახლა დაკორექტირდა და აბასთუმნის საჰაერო სივრცეში ფრენები 16 აპრილიდან აიკრძალა.

მთავრობის №52 დადგენილებით, იქმნება ახალი შეზღუდული ზონა "აბასთუმანი-2", რომელიც თურქეთ-საქართველოს საზღვრიდან 45 კილომეტრზე ვრცელდება და დაახლოებით 2000 კვ.კმ-ს მოიცავს. მასზე პასუხისმგებელი ორგანო საქართველოს განათლების, მეცნიერებისა და ახალგაზრდობის სამინისტროა.

განკარგულების დანართში ვკითხულობთ, რომ აბასთუმანში ფრენების შეზღუდვის მიზეზი "ატმოსფეროს გამჭვირვალობის უზრუნველყოფაა ასტრონომიული დაკვირვებებისთვის". ფრენები შეზღუდულია 24/7-ზე. გამონაკლისები დაიშვება:

1) საქართველოს სახელმწიფო ავიაციის საჰაერო ხომალდებისათვის;

2) ძებნა-შველის ოპერაციებში ჩართული საჰაერო ხომალდებისათვის;

3) ცუდი ამინდის შემოვლის მიზნით, ან თუ წარმოიქმნება ფრენების უსაფრთხოებასთან დაკავშირებული სხვა საჭიროება.

"რადიო თავისუფლების" ცნობით, ახალი რეგულაციით, აბასთუმნის თავზე ფრენა იკრძალება მიწის ზედაპირიდან უსასრულობამდე. ეს შეზღუდვა ოთხჯერ აღემატება თბილისის ფართობს და პირდაპირ ეხება საერთაშორისო მნიშვნელობის საჰაერო ტრასებს.

ობსერვატორიის დირექტორი, ალექსანდრე თევზაძე, აცხადებს, რომ ფრენების აკრძალვა მათი მოთხოვნა იყო, რაც ახალი ტელესკოპის მუშაობას უკავშირდება:

"ჩვენ კიდევ ერთხელ, ახალი ტელესკოპის დაკვირვების მნიშვნელობიდან გამომდინარე, ხელახლა გავაკეთეთ ეს მოთხოვნა... პრობლემა არის არა თავად ფრენა, არამედ კონდენსაციის ნაკვალევი. დაბალ ტემპერატურაზე ეს კვალი 1-დან 3 საათამდე რჩება", — განაცხადა ობსერვატორიის დირექტორმა.

როგორც "რადიო თავისუფლება" წერს, საავიაციო ინდუსტრიის წარმომადგენლები და ექსპერტები ცვლილებას ბიძინა ივანიშვილის აბასთუმნის რეზიდენციას უკავშირებენ.

ექსპერტების შეფასებით, ცის ჩაკეტვა რამდენიმე პრობლემას ქმნის. "ევროკონტროლის" ინფორმაციით, გზა დაახლოებით 10 კმ-ით იზრდება, რაც ავიაკომპანიების ხარჯებს ზრდის.
საჰაერო ნაკადები კი ჩრდილოეთით ინაცვლებს, რაც დისპეტჩერების დატვირთვას და შეცდომის რისკს ზრდის.