პარიზის ერთი ჩვეულებრივი რესტორნის ვახშმის ფასად, სულ მალე ვიღაც 1 მილიონ დოლარზე მეტად შეფასებული პიკასოს ნამუშევრის მფლობელი გახდება.

გათამაშება, სახელწოდებით "1 პიკასო 100 ევროდ", მონაწილეებს აძლევს შესაძლებლობას, სახლში წაიღონ ხელოვანის 1941 წელს შესრულებული ნახატი — Tête de Femme. ბილეთის ფასი კი, როგორც კამპანიის დასახელება მიგვანიშნებს, არის €100 (დაახლოებით $116).

ფოტო: EuroNews

14 აპრილს დაგეგმილი გათამაშებისთვის სულ 120 ათასი ბილეთია ხელმისაწვდომი. შემოსული თანხა კი სრულად გადაერიცხება ალცჰაიმერის დაავადების კვლევის ფონდს, რომელიც ამ დაავადების კლინიკურ კვლევებს მთელი ევროპის მასშტაბით უჭერს მხარ

შეგახსენებთ, რომ მსგავსი კამპანია უკვე მესამედ ტარდება. გათამაშება "1 პიკასო 100 ევროდ" პირველად 2013 წელს გაიმართა და შემოსული თანხა სამხრეთ ლიბანის ისტორიული ქალაქის, ტვიროსის, შენარჩუნებას მოხმარდა. 2020 წლის კამპანიამ კი, Covid-19-ის პანდემიის პერიოდში სუფთა წყლისა და ჰიგიენის უზრუნველყოფის პროგრამები დააფინანსა.

2020 წელს გაყიდული ნახატი

2020 წელს გაყიდული ნახატი

რაც შეეხება ნახატს, ოლივიე უიდმაიერ-პიკასომ — ესპანელი მხატვრის შვილიშვილმა — აღნიშნა, რომ პიკასომ ეს კონკრეტული ნახატი შექმნა იმავე სახელოსნოში, რომელშიც გერნიკა დახატა. ოლივიეს თქმით, Tête de Femme იმაზე ნაკლებადაა შეფასებული, ვიდრე რეალურად ღირს.

"ნამუშევარი მილიონ დოლარზე გაცილებით მეტი ღირს, ასე რომ, ეს მართლაც დიდი პრიზი იქნება", — აღნიშნა პიკასოს შვილიშვილმა.

ფოტო: The Guardian

აღსანიშნავია, რომ მანამდე პიკასოს ნამუშევრები აუქციონებზე კკოლოსალურ თანხად გაყიდულა. მაგალითად, Les Femmes d’Alger (ვერსია O) 2015 წელს $179 მილიონად გაიყიდა.

Tête de Femme

ოლივიეს მიაჩნია, რომ მისი ბაბუა აუცილებლად დაუჭერდა მხარს მსგავს ინიციატივებს.. "ბაბუაჩემი ბევრი მიმართულებით ნოვატორი იყო. ვფიქრობ, დღეს ის ვიდეოტექნოლოგიებით ან ხელოვნური ინტელექტით იქნებოდა დაინტერესებული", — თქვა მან.

ფოტო: Pablo Picasso Estate

რაც შეეხება Tête de Femme-ს, მისი სიმაღლე დაახლოებით 38 სანტიმეტრია, ხოლო სიგანე — 25. ნახატზე ვხედავთ ნაცრისფერ ტონებში შესრულებული ქალის პორტრეტს, რომლის სახე დეფორმირებულია (ცხადია, პიკასოს კუბისტურ სტილში).

გათამაშების გამარჯვებული ნახატის მომავალს თავად განსაზღვრავს. პირველი კონკურსის გამარჯვებულმა ნახატის მუზეუმში გამოფენა გადაწყვიტა. თუმცა, ოლივიეს თქმით, მფლობელს ამაში სრული თავისუფლება აქვს. "მათ შეუძლიათ ის მისაღებ ოთახში დაიკიდონ, გამოფენაზე გაიტანონ ან სულაც, გაყიდონ", — აღნიშნა ოლივიემ.