სომხეთის ანტიკორუფციულმა კომიტეტმა რუსეთთან დაკავშირებული მილიარდერის, სამველ კარაპეტიანის პარტიის, ძლიერი სომხეთის 14 წევრი დააკავა. გამოძიება მათ საარჩევნო ქრთამის მიცემასა და აღებას ედავება. უწყების ინფორმაციით, პარტიასთან დაკავშირებული არასამთავრობო ორგანიზაციის თანამშრომლებმა არარატის პროვინციაში ამომრჩევლები მოისყიდეს. კომიტეტმა ასევე გაასაჯაროვა ფარული ჩანაწერები, სადაც ჯგუფის წევრები ერთმანეთს კონსპირაციის მიზნით Viber-ით, WhatsApp-ით, Telegram-ით ან პირადად დაკავშირებას სთხოვენ. ინფორმაციას OC media ავრცელებს.

დაკავებულთა შორის დეპუტატობის ერთი ქალი კანდიდატიცაა. პარტიის წარმომადგენლის, გოჰარ მელოიანის განცხადებით, დილიდან ადვოკატებს დაკავებულებთან შესვლის უფლებას არ აძლევდნენ. მისი თქმით, მსგავსი ქმედებები "მხოლოდ დამატებით მოტივაციას აძლევს ხალხს, იბრძოლონ ნორმალურ, სამართლებრივ ქვეყანაში საცხოვრებლად". მოგვიანებით, სახალხო დამცველის აპარატის ჩარევის შემდეგ, ადვოკატებს მუშაობის საშუალება მიეცათ.

დაცვის მხარე ბრალდებას აბსურდულად მიიჩნევს. ადვოკატ ვაჰან ჰოვანისიანის განმარტებით, საქმე კარაპეტიანის საქველმოქმედო ორგანიზაციას ეხება, სადაც ადამიანები ხელფასს იღებდნენ.

"ახლა, როგორც მესმის, საგამოძიებო ორგანო ამ ხელფასებს საარჩევნო ქრთამად განიხილავს. შესაძლოა, ეს პირები ოფიციალური შრომითი ხელშეკრულებების გარეშე მუშაობდნენ, მაგრამ ეს მაქსიმუმ შრომითი ურთიერთობების დარღვევად ჩაითვალოს, რაც სისხლის სამართლის სფეროს საერთოდ არ განეკუთვნება", — აცხადებს ადვოკატი.

ეს დაკავებები 7 ივნისს დაგეგმილი საპარლამენტო არჩევნების წინ მოხდა. პარტია ძლიერი სომხეთი მომხდარს "პრემიერმინისტრ ნიკოლ ფაშინიანის პანიკის კიდევ ერთ გამოვლინებას" უწოდებს. თავად სამველ კარაპეტიანი, რომელიც პრემიერობის კანდიდატია, რუსეთისა და კვიპროსის მოქალაქეობაზე უარს ამბობს, თუმცა სომხური კანონმდებლობით, ის თანამდებობას მაინც ვერ დაიკავებს, რადგან ბოლო 4 წელი ქვეყანაში მუდმივად არ უცხოვრია.