საქართველოს მეხუთე პრეზიდენტი, სალომე ზურაბიშვილი აბასთუმნის ცის დაკეტვას გამოეხმაურა და სოციალურ ქსელში დაწერა, რომ ეს საყურადღებო, სახიფათო და უპასუხისმგებლო გადაწყვეტილებაა, რომელიც განმარტებების გარეშე მიიღეს.

"საყურადღებო, სახიფათო და უპასუხისმგებლო გადაწყვეტილება! არც განმარტება… ცაც ბიძინასია?", — დაწერა ზურაბიშვილმა?

შეგახსენებთ, 2026 წლის 16 აპრილიდან საქართველოს საჰაერო სივრცეში მნიშვნელოვანი ცვლილებები შედის. მთავრობის №52 დადგენილებით, იქმნება ახალი შეზღუდული ზონა "აბასთუმანი-2" (UGR-58), რომელიც თურქეთ-საქართველოს საზღვრიდან ქვეყნის სიღრმეში 45 კილომეტრზე ვრცელდება და დაახლოებით 2000 კვ.კმ-ს ფარავს. ინფორმაციას "რადიო თავისუფლება" ავრცელებს.

ახალი რეგულაციით, აბასთუმნის თავზე ფრენა იკრძალება მიწის ზედაპირიდან უსასრულობამდე (GND-UNL). ეს შეზღუდვა ოთხჯერ აღემატება თბილისის ფართობს და პირდაპირ ეხება საერთაშორისო მნიშვნელობის საჰაერო ტრასებს (მათ შორის N644-სა და M747-ს).