"რა შუაშია ცა, როცა ეს არის ძალიან მაღლა, ალტიტუდით ზღვის დონიდან და არა მგონია, ვინმეს უშლიდეს. ამას რაღაც ფობიას დავარქმევდი, შეშლით არავის შეუშლის", — ასე გამოეხმაურა აბასთუმანში საჰაერო მოძრაობის აკრძალვას "ეარ ჯორჯიას" დამფუძნებელი გიორგი კოდუა. მან "ტვ პირველთან" საუბრისას აღნიშნა, რომ ამ ნაბიჯის აზრს ვერ ხედავს და გაუგებარია ვის ინტერესშია აღნიშნული ცვლილება. მისივე განმარტებით, ეს "იმპროვიზაცია" საქართველოს ინტერესებში არ არის.

• დღეიდან აბასთუმნის საჰაერო სივრცე იკეტება

"ბიუჯეტში საჰაერო ნავიგაციას სერიოზული შემოსავლები აქვს, იქიდან გამომდინარე, რომ ჩრდილოეთი დაკეტილია ევროპული ავიაკომპანიებისთვის, დაიკეტა სამხრეთიც და მხოლოდ ჩვენი კორიდორია დარჩენილი, რომლითაც სარგებლობს ევროპული და აზიური ავიაკომპანიები. ამ კორიდორში გახშირდა მოძრაობა. სერიოზულად მოიმატა თვითმფრინავების ნაკადმა — ეს ფაქტი კი ძალიან კარგია საქართველოს მთავრობისთვის, რადგან დამატებითი შემოსავალია.

ამ მანევრირების და ცვლილების აზრს ვერ ვხედავ — ეს ტრასა საქართველოს მხრიდან მაქსიმალური ინტერესებიდან გამომდინარე იყო დაგეგმილი. ის ევროკონტროლთან იყო შეთანხმებული და ყოველი დამატებითი ცვლილება შეიძლება იქვას, არის იმპროვიზაცია, რომელიც საქართველოს ინტერესებში არ არის. ვის ინტერესებშია, ეს ჩემთვის გაუგებარია. თუ ვიღაცას უშლის ხელს და ამის გამო ხდება, გამოდის აბსურდის თეატრში ვართ — რა შუაშია ცა, როცა ეს არის ძალიან მაღლა, ალტიტუდით ზღვის დონიდან და არა მგონია, ვინმეს უშლიდეს. ამას რაღაც ფობიას დავარქმევდი, შეშლით არავის შეუშლის", — თქვა კოდუამ ("ტვ პირველი").

შეგახსენებთ, "საქართველოს საჰაერო სივრცის სტრუქტურისა და დიზაინის წესის დამტკიცების შესახებ" მთავრობის დადგენილებაში, რომელსაც ხელს ირაკლი კობახიძე აწერს, ცვლილებები შევიდა 2018 წლის 28 დეკემბრის მთავრობის დადგენილებაში. აღნიშნული დოკუმენტი 9 თებერვლით თარიღდება და მის მიხედვით ქვეყნის საფრენოსნო არეალი ხელახლა დაკორექტირდა და აბასთუმნის საჰაერო სივრცეში ფრენები 16 აპრილიდან აიკრძალა.

მთავრობის №52 დადგენილებით, იქმნება ახალი შეზღუდული ზონა "აბასთუმანი-2", რომელიც თურქეთ-საქართველოს საზღვრიდან 45 კილომეტრზე ვრცელდება და დაახლოებით 2000 კვ.კმ-ს მოიცავს. მასზე პასუხისმგებელი ორგანო საქართველოს განათლების, მეცნიერებისა და ახალგაზრდობის სამინისტროა.

განკარგულების დანართში ვკითხულობთ, რომ აბასთუმანში ფრენების შეზღუდვის მიზეზი "ატმოსფეროს გამჭვირვალობის უზრუნველყოფაა ასტრონომიული დაკვირვებებისთვის". ფრენები შეზღუდულია 24/7-ზე. გამონაკლისები დაიშვება:

1) საქართველოს სახელმწიფო ავიაციის საჰაერო ხომალდებისათვის;

2) ძებნა-შველის ოპერაციებში ჩართული საჰაერო ხომალდებისათვის;

3) ცუდი ამინდის შემოვლის მიზნით, ან თუ წარმოიქმნება ფრენების უსაფრთხოებასთან დაკავშირებული სხვა საჭიროება.