რუსეთი დათანხმდა აზერბაიჯანული ავიალაინერის ჩამოგდების შედეგად მიყენებული ზარალის ანაზღაურებას — ნათქვამია ორი ქვეყნის მიერ 15 აპრილს გავრცელებული ერთობლივ განცხადებაში.

2024 წელს მომხდარ ტრაგედიას, რომელმაც ორ ქვეყანას შორის ურთიერთობები დაძაბა, 38 ადამიანი ემსხვერპლა.

"აზერბაიჯანის ავიახაზების" კუთვნილი თვითმფრინავი, რომელიც ბაქოდან ჩეჩნეთის დედაქალაქ გროზნოს მიმართულებით მიფრინავდა, 2024 წლის 25 დეკემბერს ყაზახეთის ტერიტორიაზე ჩამოვარდა. კატასტროფის მიზეზი რუსეთის საჰაერო თავდაცვის სისტემის მიერ გახსნილი ცეცხლი გახდა.

რუსეთისა და აზერბაიჯანის საგარეო საქმეთა სამინისტროების ერთობლივ განცხადებაში ნათქვამია, რომ მომხდარი რუსეთის ფედერაციის საჰაერო სივრცეში "საჰაერო თავდაცვის სისტემის მიერ განხორციელებული უნებლიე დარტყმის" შედეგი იყო. მხარეებმა, სხვა საკითხებთან ერთად, მოაგვარეს ავიაკატასტროფასთან დაკავშირებული კომპენსაციის გადახდის საკითხიც, თუმცა გადასახდელი თანხის ოდენობა ამ ეტაპზე არ საჯაროვდება.

ამ ფატალურმა შემთხვევამ მნიშვნელოვნად დაძაბა მოსკოვსა და ბაქოს შორის არსებული ურთიერთობები.

მომხდარზე, რუსეთის პრეზიდენტმა, ვლადიმერ პუტინმა რუსეთის პასუხისმგებლობა მხოლოდ 2025 წლის ოქტომბერში აღიარა. მან პირობა დადო, რომ სამართლებრივად შეფასდებოდა იმ თანამდებობის პირების ქმედებები, რომლებიც ამ ინციდენტში იყვნენ ჩართულნი. კრემლის განმარტებით, იმ დღეს რუსული სამხედრო ძალები სამ უკრაინულ დრონს "აკვირდებოდნენ“, რომლებმაც რუსეთის საჰაერო სივრცე გადაკვეთეს.

"გადადგმული ნაბიჯები ადასტურებს ორმხრივ მისწრაფებას, მომავალშიც განავითარონ ურთიერთსასარგებლო თანამშრომლობა მოკავშირეობრივი ურთიერთქმედების ფარგლებში", — ნათქვამია განცხადების დასკვნით ნაწილში.

ალიევი აცხადებს, რომ ბაქო თვითმფრინავის ჩამოვარდნის საქმეზე რუსეთის წინააღმდეგ სარჩელს ამზადებს.