სანქცირებული ტელეკომპანია "იმედის" შემდეგ, ირაკლი რუხაძემ "ლიბერთი ბანკიც" გაყიდა. ბიზნესმენმა თავისი ბანკი "ბაზისბანკს" მიჰყიდა". "ბაზისბანკის" მიერ "ლიბერთი ბანკის" 95.99%-იანი წილის შეძენის შემდეგ, "ბაზისბანკის" გენერალური დირექტორი დავით ცაავა "ლიბერთი ბანკშიც" იმავე პოზიციაზე დაინიშნა. ამის შესახებ ინფორმაციას bm.ge ავრცელებს.

ბანკის მიერ გავრცელებული ინფორმაციით, ეს გადაწყვეტილება ბიზნეს პროცესების უწყვეტობისა და ორი ფინანსური ინსტიტუტის კოორდინირებულად მართვის უზრუნველსაყოფად მიიღეს. მიუხედავად მენეჯმენტის ცვლილებისა, ბანკები ოპერაციულად მუშაობას ჩვეულ რეჟიმში აგრძელებენ.

"მიმდინარე ეტაპზე ორივე ბანკი ჩვეულ რეჟიმში, დამოუკიდებლად აგრძელებს საქმიანობას. ბაზისბანკის მომხმარებლები მომსახურებას მიიღებენ ბაზისბანკში, ხოლო ლიბერთი ბანკის მომხმარებლები — ლიბერთი ბანკში. მომხმარებლებისთვის ყველა სერვისი, პროდუქტი და არხი მუშაობს შეუფერხებლად და მომსახურება გრძელდება ჩვეულ რეჟიმში", — ნათქვამია ბანკის მიერ გავრცელებულ განცხადებაში.

თავად დავით ცაავა, რომლის საბანკო კარიერა 2004 წლიდან "ბაზისბანკს" უკავშირდება, განხორციელებულ ტრანზაქციას ბაზარზე კონკურენციის გაძლიერების შესაძლებლობად აფასებს:

"აღნიშნული ტრანზაქცია უმნიშვნელოვანესი ეტაპია ორი წარმატებული ბანკის ისტორიაში. ბაზისბანკის მიერ ლიბერთი ბანკის შეძენა არის უნიკალური შესაძლებლობა ადამიანური და ტექნოლოგიური რესურსების სინერგიით შევქმნათ მძლავრი უნივერსალური ფინანსური პლატფორმა, რომელიც თანაბრად ძლიერია, როგორც ბიზნესის მხარდაჭერით, ისე საცალო მიმართულებით. ამ გარიგებით, ვაძლიერებთ კონკურენციას ბაზარზე, რაც პოზიტიურად აისახება მომხმარებელთა ინტერესებზე. დამატებითი რესურსები კი, მეტი ბიზნესის დაფინანსების შესაძლებლობაა, რაც ქვეყნის ეკონომიკურ განვითარებას შეუწყობს ხელს", — განაცხადა ცაავამ.

ბანკში მიიჩნევენ, რომ ორი ფინანსური ინსტიტუტის ერთობა, რომელთაც ერთმანეთის შემავსებელი ძლიერი მხარეები აქვთ, მნიშვნელოვნად შეუწყობს ხელს მომხმარებლებისთვის მრავალფეროვანი პროდუქტების შეთავაზებას. BM.GE წერს, რომ 2025 წლის ფინანსური შედეგებით, "ბაზისბანკის"აქტივები 4.9 მლრდ ლარს, ხოლო "ლიბერთი ბანკის" 5.8 მილიარდ ლარს შეადგენს. ორივე ბანკმა გასულ წელს ჯამურად 250 მილიონ ლარზე მეტი წმინდა მოგება დააფიქსირა. ამ გარიგებით სრულდება მოლაპარაკებების პროცესი, რომლის შესახებაც "ლიბერთი ბანკის" სამეთვალყურეო საბჭოს თავმჯდომარე, ირაკლი რუხაძე ჯერ კიდევ 2025 წლის სექტემბერში საუბრობდა.

შეგახსენებთ, მანამდე სამთავრობო ტელეკომპანია "იმედის" მფლობელმა ბიზნესმენმა ირაკლი რუხაძემ და მისმა პარტნიორებმა სამთავრობო "ტელე-იმედი" გაყიდეს. ამის შესახებ ირაკლი რუხაძე სამთავრობო ტელეკომპანია "იმედის" მიერ გავრცელებულ განცხადებაში წერს. მისი თქმით, "პარტნიორებთან გრძელი და დაძაბული კონსულტაციების შემდეგ, გადავწყვიტეს, რომ დღევანდელ სიტუაციაში, ყველაზე გონივრული გამოსავალი "იმედთან" დამშვიდობებაა".

როგორც რუხაძის წერილიდან ვიგებთ, ტელე-იმედის 50%-იანი წილი "პრაიმ მედია გლობალმა" იყიდა. 50% კი გადავა მაკა ლომიძისა და მისი 4 მოადგილის მფლობელობაში".