თურქეთში, იმ ანგარიშების გამოსავლენად, რომლებიც სკოლებზე თავდასხმის შესახებ საზოგადოებაში შიშსა და პანიკას თესავდნენ, ფართომასშტაბიანი ღონისძიებები გატარდა.

თურქეთის იუსტიციის მინისტრის განმარტებით, პროკურატურის მიერ გამოძიება სულ 130 ანგარიშის მფლობელის წინააღმდეგ დაიწყო, საიდანაც 95 პირი უკვე დაკავებულია, 35-ზე კი ძიება გრძელდება. ამასთან, გამოძიების ფარგლებში წვდომა შეიზღუდა 1104 ანგარიშზე.

ასევე იდენტიფიცირებულია 67 მომხმარებელი, რომლებიც 54 სხვადასხვა სკოლას თავდასხმით ემუქრებოდნენ და საზოგადოებაში პანიკას თესავდნენ, მათ წინააღმდეგ სამართლებრივი პროცედურები ამ დრომდე მიმდინარეობს — ინფორმაციას Anadolu ავრცელებს.

დაკავებულია ქაჰრამანმარაშის თავდასხმაში ბრალდებული 14 წლის მოზარდის მამა, პოლიციის მთავარი ინსპექტორი, უღურ მერსინლი. მერსინლი, რომლის კუთვნილი იარაღიც გამოიყენა მისმა შვილმა დანაშაულის ჩასადენად, დაკითხვის შემდეგ სასამართლოში გადაიყვანეს, სადაც მას პატიმრობა შეეფარდა. რაც შეეხება შანლიურფის პროვინციას, ოფიციალური ინფორმაციით, აჰმედ ქოიუნჯუს სახელობის სასწავლებელზე მომხდარ თავდასხმასთან დაკავშირებით დაკავებულთა რაოდენობა 20-მდე გაიზარდა.

მიუხედავად დაკავებულთა დიდი რაოდენობისა, საგამოძიებო უწყებები აცხადებენ, რომ ამ ეტაპზე ტერორისტული კავშირები არ იკვეთება და აქცენტი კეთდება იმ ციფრული პლატფორმების შესწავლაზე, რომლებიც ბავშვებში აგრესიულ ქმედებებს უწყობენ ხელს.