მაიკლ ჯეი ფოქსმა განაცხადა, რომ ის "კარგადაა" მას შემდეგ, რაც CNN-მა მსახიობის ხსოვნისადმი მიძღვნილი მასალა გამოაქვეყნა, რომელიც მოგვიანებით საიტიდან აიღეს.

მაიკლ ჯეი ფოქსი ფილმში Back To The Future

ფოტო: Universal Pictures

"მასალა შეცდომით გამოქვეყნდა; ჩვენ ის ყველა პლატფორმიდან წავშალეთ და ბოდიშს ვუხდით მაიკლ ჯეი ფოქსს და მის ოჯახს", — ნათქვამია CNN-ის განცხადებაში.

ოთხშაბათს გვიან ღამით, ფოქსმა სოციალურ ქსელში დაწერა:

"როგორი რეაქცია გაქვთ, როცა ტელევიზორს რთავთ და CNN თქვენს გარდაცვალებაზე იუწყება? თქვენ...

  • გადართავთ MSNBC-ზე, ან რასაც ეძახიან საკუთარ თავს ამ დღეებში,
  • კალთაში მდუღარე წყალს გადაისხამთ: თუ გეტკინათ, ესე იგი ცოცხალი ხართ,
  • დაურეკავთ ცოლს იმ იმედით, რომ შეწუხდება, მაგრამ დაგამშვიდებთ,
  • დაიკიდებთ, რადგან ამას წელიწადში ერთხელ ისედაც აკეთებენ,
  • საკუთარ თავს ჰკითხავთ: 'რა ხდება?' მეგონა სამყარო იღუპებოდა, მაგრამ თურმე მხოლოდ მე ვყოფილვარ და თანაც კარგად ვარ.

სიყვარულით, მაიკი."

CNN-ის შეცდომით გამოქვეყნებული მასალა

ფოტო: TMZ

ფოქსი პარკინსონის დაავადების კვლევის აქტიური მხარდამჭერია, მას ეს დიაგნოზი 1990-იან წლებში დაუსვეს. ამ კვირაში მსახიობი ლოს-ანჯელესში გამოჩნდა Apple TV-ის სერიალის, თერაპიის (Shrinking), პრეზენტაციაზე, რომელშიც პარკინსონით დაავადებული პერსონაჟის როლს თამაშობს.

მედიასაშუალებები, როგორც წესი, წინასწარ გამზადებული ნეკროლოგებისა და ხსოვნის მასალების არქივს ინახავენ. ეს ნამდვილად არ არის პირველი შემთხვევა, როდესაც ცოცხალი ცნობილი ადამიანის შესახებ ასეთი მასალა შეცდომით ქვეყნდება. 1998 წელს Associated Press-მა შემთხვევით გამოაქვეყნა ბობ ჰოუპის ნეკროლოგი, როცა ის ჯერ კიდევ ცოცხალი იყო. მაშინ ერთ-ერთმა კონგრესმენმა ეს ამბავი ნახა და მისი გარდაცვალება წარმომადგენელთა პალატის ტრიბუნიდანაც კი გამოაცხადა.