პარლამენტმა, დაჩქარებული წესით, მესამე მოსმენით განიხილა და 72 ხმით მხარი დაუჭირა ცვლილებებს "გრანტების შესახებ" კანონში. საკითხი პლენარულ სხდომაზე იურიდიულ საკითხთა კომიტეტის თავმჯდომარემ, არჩილ გორდულაძემ წარადგინა.

კანონპროექტის თანახმად, იცვლება გრანტის დეფინიცია გარკვეულ შემთხვევებში. კერძოდ, გრანტად აღარ ჩაითვლება საქართველოში აკრედიტებული დიპლომატიური წარმომადგენლობების, საკონსულოებისა და საერთაშორისო ორგანიზაციების მიერ გაცემული ის ფინანსური სახსრები, რომლებიც, ხმარდება ან შეიძლება მოხმარდეს ისეთ საქმიანობას, რომელიც უცხო ქვეყნის ხელისუფლების ან უცხოური პოლიტიკური პარტიის პოლიტიკური ან საჯარო ინტერესებიდან, მიდგომებიდან ან ურთიერთობებიდან გამომდინარეობს.

ცვლილებები ასევე განსაზღვრავს იმ სუბიექტებს, რომლებზეც უცხოური გრანტის გაცემის ზოგადი წესი არ გავრცელდება. შეზღუდვები არ შეეხება "საქართველოს წითელი ჯვრის საზოგადოების შესახებ" კანონით გათვალისწინებულ ორგანიზაციას და მის მიერ გაცემულ გრანტებს. წესი ასევე არ გავრცელდება საფინანსო-საკრედიტო ინსტიტუტების მიერ გაცემულ გრანტებზე.