"თავისი სახლების თავზე ცას კეტავდნენ მუამარ კადაფი, სადამ ჰუსეინი და სხვა მსგავსი ოდიოზური დიქტატორები", — ასე გამოეხმაურა ლელო-ძლიერი საქართველოს ერთ-ერთი ლიდერი თაზო დათუნაშვილი აბასთუმნის ცის დაკეტვას. მისი თქმით მსგავსი გადაწყვეტილება საერთაშორისო თვალსაზრისით სამარცხვინოა.

"ძალიან მარტივია ის ტრაგიკული რეალობა, რომელიც საქართველოს ყველა მოქალაქემ უნდა გაიაზროს, რომ ის ცხოვრობს კლასიკურ კარიკატურულ დიქტატურაში. თავისი სახლების თავზე ცას კეტავდნენ მუამარ კადაფი, სადამ ჰუსეინი და სხვა მსგავსი ოდიოზური დიქტატორები. ივანიშვილიც ასეთი კაცია — ახირებული ბერიკაცი თავისი შიშებით, სურვილებით და ყველაზე მთავარი რაც არის შესაძლებლობით, რომ რაც უნდა ის აკეთოს ამ ქვეყანაში. მათ შორის, გადაკეტოს მთელი დასახლებული პუნქტი, თქვას, რომ "აქ მანქანა ვეღარ შემოვა“ და ამ პუნქტის თავზე ცაც დაკეტოს ისე, რომ ჩიტმაც ვერ გადაიფრინოს. ეს არის ჩვეულებრივი დიქტატორული ახირება და ასეთების სიმრავლე იქნება რაც უფრო წლები გავა.

არ დაგვავიწყდეს, რომ ივანიშვილი უკვე ასაკში შედის და ასეთი შიშები ასაკში შესულ დიქტატორებს ძალიან უმძაფრდებათ ხოლმე. მსგავსი რაღაცები ძალიან ჩვეულებრივი ამბავი იქნება ხოლმე. როგორც ეროვნული ბანკის საცავი არის დღეს ივანიშვილის პირადი საცავი და თავის ოქროსა და ნახატებს ინახავს, ზუსტად ასე დაკეტავს ცას ამიერიდან. სამარცხვინოა საერთაშორისო თვალსაზრისით — მაგისტრალური გზები ასე არ იგეგმება, რომ ვიღაცამ ბიძინა ივანიშვილის სახლს შემოუფრინოს. უბრალოდ წავა ყველა ის მაგისტრალი და სხვა ქვეყანაზე გაივლის", — განაცხადა თაზო დათუნაშვილმა

შეგახსენებთ, 2026 წლის 16 აპრილიდან საქართველოს საჰაერო სივრცეში მნიშვნელოვანი ცვლილებები შედის. მთავრობის №52 დადგენილებით, იქმნება ახალი შეზღუდული ზონა "აბასთუმანი-2" (UGR-58), რომელიც თურქეთ-საქართველოს საზღვრიდან ქვეყნის სიღრმეში 45 კილომეტრზე ვრცელდება და დაახლოებით 2000 კვ.კმ-ს ფარავს. ინფორმაციას "რადიო თავისუფლება" ავრცელებს.

ახალი რეგულაციით, აბასთუმნის თავზე ფრენა იკრძალება მიწის ზედაპირიდან უსასრულობამდე. ეს შეზღუდვა ოთხჯერ აღემატება თბილისის ფართობს და პირდაპირ ეხება საერთაშორისო მნიშვნელობის საჰაერო ტრასებს.