"ტვ პირველი" განცხადებას ავრცელებს, სადაც ნათქვამია, რომ ტელეკომპანია "იმედი" მათ შესახებ ტყუილს ავრცელებს. ტელეკომპანიის განმარტებით, "იმედის" მიერ გავრცელებული ინფორმაცია, თითქოს "ტვ პირველს", ქართულ ოცნების მთავრობაში მოსალოდნელი საკადრო ცვლილებების შესახებ ინფორმაციის გავრცელება დაავალა ვინმე ბლაჟვიჩმა სიმართლეს არ შეესაბამება.

"ტვ პირველი" აცხადებს, რომ "იმედის" ჟურნალისტი მათ საპასუხო კომენტარის მისაღებად არ დაუკავშირდა, რაც მაუწყებლობის შესახებ" საქართველოს კანონის დარღვევაა.

"ტელეკომპანია "იმედი" "ტვ პირველის" შესახებ ავრცელებს ტყუილს!

ტელეკომპანია "იმედი", რომელიც დიდი ბრიტანეთის მიერ სანქცირებულია რუსული პროპაგანდის გავრცელების გამო, ავრცელებს ცრუ ინფორმაციას ტვ პირველის შესახებ. დღეს, 16 აპრილს საინფორმაციო გამოშვება ქრონიკაში, გადმოცემული ინფორმაცია, რომ თითქოს ტვ პირველს, ქართულ ოცნების მთავრობაში მოსალოდნელი საკადრო ცვლილებების შესახებ ინფორმაციის გავრცელება დაავალა ვინმე ბლაჟვიჩმა არის ტყუილი, დეზინფორმაცია, არ შეესაბამება სინამდვილეს და არ ეფუძნება არანაირ ფაქტობრივ გარემოებებს.

განსაკუთრებით საყურადღებოა, რომ აღნიშნული მასალის მომზადების პროცესში ტელეკომპანია "იმედის" ჟურნალისტი არ დაუკავშირდა ტელეკომპანია "პირველს" საპასუხო კომენტარის მისაღებად, რაც წარმოადგენს "მაუწყებლობის შესახებ" საქართველოს კანონის დარღვევას", — წერია განცხადებაში.

"ტვ პირველი" მოითხოვს დეზინფორმაციის გავრცელების დაუყოვნებლივ შეწყვეტას და მათი არხის პოზიციის მკაფიოდ და სრულად გაშუქებას "ტელეიმედის" საინფორმაციო გამოშვებაში.

"ტვ პირველი" კომუნიკაციების მარეგულირებელ კომისიასაც მიმართავს, რომ დაუყოვნებლივ მოახდინოს რეაგირება.

"ტვ პირველი" მოითხოვს:

• დაუყოვნებლივ შეწყდეს დეზინფორმაციის გავრცელება;
• მკაფიოდ და სრულად გაშუქდეს ჩვენი არხის ოფიციალური პოზიცია ტელეიმედის საინფორმაციო გამოშვებაში, სადაც გადაიცა ყალბი ინფორმაცია.

მივმართავთ კომუნიკაციების მარეგულირებელ კომისიას, დაუყოვნებლივ მოახდინოს რეაგირება. ვაცხადებთ, რომ მსგავსი ყალბი ინფორმაციის გავრცელება ემსახურება დამოუკიდებელი მედიის დისკრედიტაციის მცდელობას", — წერია გავრცელებულ განცხადებაში.