ეს პირველი შემთხვევაა, როდესაც აუქციონზე ტიტანიკის კატასტროფას გადარჩენილი ადამიანის კუთვნილი სამაშველო ჟილეტი იყიდება.

უნიკალური ექსპონატი გასაყიდად ამ უქმეებზე გამოვა. აუქციონერები ამ მოვლენას "თაობაში ერთხელ" მომხდარ შანსს უწოდებენ. ბრიტანული აუქციონის სახლის, Henry Aldridge and Son-ის ვარაუდით, ჟილეტის ფასი 250,000-დან 350,000 ფუნტ სტერლინგამდე ($474,000-მდე) ავა.

ეს სამაშველო ჟილეტი პირველია ტიტანიკის გადარჩენილი მგზავრის კუთვნილ ნივთებს შორის, რომელიც ოდესმე აუქციონზე გამოტანილა

ფოტო: Henry Aldridge and Son Ltd

სამოსი ლორა მეიბელ ფრანკატელის ეკუთვნოდა, რომელიც ისტორიული ლაინერის პირველი კლასის მგზავრი იყო. შეგახსენებთ, რომ ტიტანიკი ზუსტად 114 წლის წინ, სწორედ ამ კვირაში ჩაიძირა.

როდესაც ხომალდი 1912 წლის 10 აპრილს რეისში გავიდა, ის უდიდესი სამგზავრო გემი და "ჩაუძირავად" მიჩნეული ობიექტი იყო. თუმცა, სულ რაღაც ოთხ დღეში, 14 აპრილს, 23:40 საათზე, ატლანტის ოკეანეში აისბერგთან შეჯახების შემდეგ, ტიტანიკის სადებიუტო მოგზაურობა საერთაშორისო ტრაგედიად იქცა. გემი სამ საათზე ნაკლებ დროში ჩაიძირა. ბორტზე მყოფი დაახლოებით 2,220 ადამიანიდან მხოლოდ 700-მდე გადარჩა — ხომალდზე უბრალოდ არ აღმოჩნდა საკმარისი რაოდენობის სამაშველო ნავები.

ლორა მეიბელ ფრანკატელი (შემოხაზული) სამაშველო ნავის სხვა გადარჩენილ მგზავრებთან ერთად. ბორტზე მყოფი 2,220 ადამიანიდან მხოლოდ 700-მდე გადარჩა

ფოტო: Henry Aldridge and Son Ltd

ფრანკატელი მოდის დიზაინერ ლუსი დაფ გორდონის მდივანი იყო. ის ჩიკაგოში თავის დამსაქმებელთან და მის მეუღლესთან ერთად მგზავრობდა. სამივე მათგანმა გადარჩენა ნომერ პირველ სამაშველო ნავში მოხვედრით მოახერხა. კრემისფერ ჟილეტზე, რომელიც კორპით შევსებული 12 ჯიბისგან შედგება, დატანილია თავად ფრანკატელისა და იმავე ნავით გადარჩენილი სხვა პირების ავტოგრაფები.

აუქციონის სახლის მმართველმა დირექტორმა, ენდრიუ ოლდრიჯმა CNN-თან საუბრისას აღნიშნა:

"ეს სამაშველო ჟილეტი კოლექციონერებისთვის მართლაც უპრეცედენტო შესაძლებლობაა. მიუხედავად იმისა, რომ ტრაგედიიდან 114 წელი გავიდა, ბორტზე მყოფ თითოეულ ადამიანს თავისი ისტორია ჰქონდა. ჩვენს წინაშეა 2,200-ზე მეტი ამბავი და დღეს ამ ისტორიებს სწორედ ასეთი ნივთების მეშვეობით ვყვებით".

ამ დრომდე ჟილეტი ბელფასტის ტიტანიკის მუზეუმსა და ტენესის შტატში მდებარე მსოფლიოს უდიდეს თემატურ მუზეუმში იყო გამოფენილი. ნივთის ამჟამინდელმა მფლობელმა კი გადაწყვიტა, რომ "ესტაფეტა სხვა კოლექციონერს გადასცეს".