ბათუმში, ყოფილი მანქანათმშენებელი ქარხნის ტერიტორიაზე UEFA-ს IV კატეგორიის საფეხბურთო სტადიონი აშენდება. მშენებლობის სავარაუდო ღირებულება 101 მილიონ 700 ათასი ლარია.

შესაბამისი ტენდერი აჭარის ავტონომიური რესპუბლიკის კუთვნილმა კომპანიამ, შპს სტადიონმა 19 ოქტომბერს გამოაცხადა. დოკუმენტაციის მიხედვით, სტადიონი 20 000 მაყურებელზეა გათვლილი. ხოლო სამუშაოს შესრულების სავალდებულო ვადა ხელშეკრულების გაფორმებიდან ორი წელი და 10 თვეა.

წინადადადებების მიღება 16 ნოემბერს დაიწყება და 21 ნოემბერს შეწყდება.

ბათუმის სტადიონის აშენებამდე, უეფა-ს მეოთხე კატეგორიის სტადიონი საქართველოში მხოლოდ ერთია - ბორის პაიჭაძის სახელობის დინამო არენა. უეფა-ზე პირველი და მეორე ტურის მოგების და პლეიოფში გასვლის შემთხვევაში, გუნდს შეუძლია მესამე კატეგორიის სტადიონზე ითამაშოს. ხოლო მეოთხე კატეგორიის სტადიონზე ჩემპიონთა ლიგის ჯგუფური ეტაპის მატჩები და ყველა სანაკრებო თამაშის ჩატარებაა შესაძლებელი. აღსანიშნავია, რომ ქართულ გუნდებს პირველი ტურის გადალახვაც უჭირთ.