საქართველოს პრეზიდენტმა, გიორგი მარგველაშვილმა საკონსტიტუციო ცვლილებებს ხელი მოაწერა. ამის შესახებ მან ბრიფინგზე განაცხადა:

"ჩემთვის უაღრესად ძნელია ამ კონსტიტუციაზე ხელის მოწერა და მიუხედავად ამისა, ქვეყნის შიდა და გარე გამოწვევებიდან გამომდინარე, გამომდინარე იქიდან, რომ უნდა ყველანაირი ნაბიჯი გადავდგათ, რომ თავიდან აცილებულ იყოს შესაძლო დესტაბილიზაციის მიზეზები, მე როგორც სახელმწიფოს მეთაური, სამხედრო ძალების უმაღლესი მთავარსარდალი და კონსტიტუციის გარანტი, ხელს ვაწერ ამ დოკუმენტს".

მისი თქმით, კონსტიტუციის ცვლილებების პროექტის დაწყებისას მან იცოდა, რომ მმართველის გუნდი "ერთპარტიული კონსტიტუციის" მიღებისთვის ემზადებოდა:

"მე და ჩემი გუნდი როგორც ქვეყნის შიგნით, ისე ქვეყნის გარეთ ვაფიქსირებდით ერთ მარტივ ჭეშმარიტებას, რომ კონსტიტუცია ყველასია და ვცდილობდით, რომ ქვეყანას მიეღო თანხმობაზე დაფუძნებული დოკუმენტი. ბოლოს ამ მიზნით გამოვიყენე ვეტოს უფლება".

პრეზიდენტის განმარტებით, მისი დღევანდელი გადაწყვეტილება სახელმწიფოს ინტერესებიდან გამომდინარე გადადგმულ ნაბიჯად უნდა განიხილებოდეს.

13 ოქტომბერს რიგგარეშე სხდომაზე ქართულმა ოცნებამ საქართველოს პრეზიდენტის მოტივირებული შენიშვნები არ გაითვალისწინა და კონსტიტუციის პროექტზე დადებული ვეტო დაძლია და კანონპროექტის პირვანდელ რედაქციასაც უყარა კენჭი.

9 ოქტომბერს გიორგი მარგველაშვილმა მესამე მოსმენით მიღებულ კონსტიტუციის პროექტს ვეტო დაადო. გიორგი მარგველაშვილის განცხადებით, ექვსი შენიშვნიდან პირველი ოთხი საკითხი არის ის ვალდებულებები, რომლებიც ქართულმა ოცნებამ ვენეციის კომისიისგან აიღო. ესენია: ბონუსის, ბლოკების, საკონსტიტუციო სასამართლოსა და აღმსარებლობის თავისუფლების საკითხები. მეხუთე საკითხი ეხება 2020 წელს პროპორციულ საარჩევნო სისტემაზე გადასვლას, ხოლო მეექვსე - პრეზიდენტის არჩევის წესს.