საქართველოს პრეზიდენტმა, გიორგი მარგველაშვილმა საქართველოს კონსტიტუციური ცვლილებების პროექტს ვეტო დაადო. პრეზიდენტის მოტივირებული შენიშვნები პარლამენტს დღეს, 9 ოქტომბერს გადაეგზავნება.

გიორგი მარგველაშვილის განცხადებით ექვსი შენიშვნიდან პირველი ოთხი საკითხი არის ის ვალდებულებები, რომლებიც ქართულმა ოცნებამ ვენეციის კომისიისგან აიღო. ესენია: ბონუსის, ბლოკების, საკონსტიტუციო სასამართლოსა და აღმსარებლობის თავისუფლების საკითხები.

მეხუთე საკითხი ეხება 2020 წელს პროპორციულ საარჩევნო სისტემაზე გადასვლას, ხოლო მეექვსე - პრეზიდენტის არჩევის წესს.

"ამ ექვსი შეთავაზების განხილვისა და გაზიარების შემთხვევაში, ჩვენ შეიძლება მივაღწიოთ ძალიან ბევრს. პირველ რიგში, ჩვენ მივიღებთ კონსტიტუციას, რომელსაც ექნება ოპოზიციის ხმები, ოპოზიციის მხარდაჭერა პარლამენტს გარეთ. ჩვენ მივიღებთ თანხმობის დოკუმენტს", - განაცხადა პრეზიდენტმა.

26 სექტემბერს, საქართველოს პარლამენტმა კონსტიტუციის პროექტი მესამე მოსმენით მიიღო. კანონპროექტის მიღებას მხარი 117-მა დეპუტატმა დაუჭირა. კენჭისყრას არ ესწრებოდნენ ნაციონალური მოძრაობისა და ევროპული საქართველოს დეპუტატები.