8 მომხრე 110 წინააღმდეგი - ქართულმა ოცნებამ საქართველოს პრეზიდენტის მოტივირებული შენიშვნები არ გაითვალისწინა და კონსტიტუციის პროექტზე დადებული ვეტო დაძლია. შენიშვნები პარლამენტის წევრებს დღეს, 13 ოქტომბერს პრეზიდენტის საპარლამენტო მდივანმა, ანა დოლიძემ გააცნო.

საქართველოს პარლამენტმა კონსტიტუციაში ცვლილების შეტანის კანონპროექტის პირვანდელ რედაქციასაც უყარა კენჭი. მას 117-მა დეპუტატმა დაუჭირა მხარი, ხოლო წინააღმდეგი იყო 7.

"ქალბატონებო და ბატონებო, გილოცავთ კონსტიტუციის ახალი რედაქციის მიღებას. ჩვენ ნამდვილად მივიღეთ ეროვნულ ინტერესებზე აგებული ევროპული ტიპის კონსტიტუცია" , - ასე მიმართა პარლამენტის თავმჯდომარემ, ირაკლი კობახიძემ დეპუტატებს.

9 ოქტომბერს გიორგი მარგველაშვილმა მესამე მოსმენით მიღებულ კონსტიტუციის პროექტს ვეტო დაადო. ეს პრეზიდენტის რიგით მეათე ვეტოა.

გიორგი მარგველაშვილის განცხადებით, ექვსი შენიშვნიდან პირველი ოთხი საკითხი არის ის ვალდებულებები, რომლებიც ქართულმა ოცნებამ ვენეციის კომისიისგან აიღო. ესენია: ბონუსის, ბლოკების, საკონსტიტუციო სასამართლოსა და აღმსარებლობის თავისუფლების საკითხები. მეხუთე საკითხი ეხება 2020 წელს პროპორციულ საარჩევნო სისტემაზე გადასვლას, ხოლო მეექვსე - პრეზიდენტის არჩევის წესს.