ჰავაის შტატის ფედერალურმა მოსამართლემ აშშ-ის პრეზიდენტის, დონალდ ტრამპის საიმიგრაციო ბრძანება, რომლითაც რვა ქვეყნის მოქალაქეებს ქვეყნის ტერიტორიაზე მოგზაურობა ეზღუდებათ, დაბლოკა.

ბრძანება, რომელიც სექტემბერში გამოიცა, ირანის, იემენის, ლიბიის, სირიის, სომალის, ჩრდილოეთ კორეის, ჩადის მოქალაქეებსა და ვენესუელის კონკრეტული თანამდებობის პირებს ეხებათ.

მოსამართლე დერეკ უოტსნომა განმარტა, რომ მარტში დაბლოკილი ბრძანების მსგავსად, ამაშიც არის კანონდარღვევები. უოტსონის თქმით, ქვეყანაში შესვლის აკრძალვა პოტენციურად რვა ქვეყნის 150 მილიონ მოქალაქეს ეხება და ამერიკის ინტერესებს ეწინააღმდეგება. გადაწყვეტილება მან ჰავაის შტატის მთავრობის საჩივრის საფუძველზე მიიღო.

წინა ორი ბრძანებისგან განსხვავებით, რომლებიც იანვარსა და მარტში გამოიცა, ახალი აკრძალვა განუსაზღვრელი ვადითაა გამოცემული. ტრამპის ადმინისტრაციამ განმარტა, რომ ქვეყნებს, რომლებიც შეზღუდვაში მოხვდნენ, არ სურთ ან არ შეუძლიათ ვიზისთვის საჭირო ინფორმაციის მოწოდება.

პარალელურად, ვაშინგტონის, მასაჩუსეტსის, კალიფორნიის, ორეგონის, ნიუ-იორკისა და მერილენდის შტატები პრეზიდენტის ბრძანების გამო ფედერალურ საოლქო სასამართლოში დაობენ.

თეთრი სახლის პრესმდივნის განცხადებაში ნათქვამია, რომ "ეს შეზღუდვები სასიცოცხლოდ მნიშვნელოვანია იმისათვის, რომ ქვეყნებმა უსაფრთხოების მინიმალური სტანდარტები დაიცვან, რომლებიც აშშ-ის საიმიგრაციო სისტემისთვისა და უსაფრთხოებისთვის არის საჭირო".

მისივე თქმით, დონალდ ტრამპის ქმედება იურიდიულად დასაბუთებულია და იმედოვნებს, რომ სააპელაციო ინსტანციები საბოლოოდ დაუშვებენ ბრძანებას.

აკრძალვა მუსლიმური ქვეყნის მოქალაქეებისთვის

აშშ-ის პრეზიდენტმა თავისი პირველი საიმიგრაციო ბრძანება 27 იავნარს გამოსცა და გამოქვეყნებისთანავე შევიდა ძალაში. ამან ამერიკის აეროპორტებში ქაოსი გამოიწვია, რადგან მოქალაქეებს, რომლებსაც ვიზა ლეგალურად ჰქონდათ მიღებული, ქვეყანაში არ უშვებდნენ.

ბრძანება შვიდ მუსლიმურ ქვეყანას შეეხო, მათ შორის, ერაყს და სირიელი ლტოლვილების მიღებას სრულად ზღუდავდა. მოსამართლეებმა ბრძანება მალევე შეაჩერეს და განაცხადეს, რომ ის არაკონსტიტუციურ ქმედებებს იწვევს.

საპრეზიდენტო არჩევნების კამპანიისას დონალდ ტრამპი ამომრჩეველს ჰპირდებოდა, რომ აშშ-ში მუსლიმების შესვლას აკრძალავდა, რაც ქვეყნის კონსტიტუციას ეწინააღმდეგება. აშშ-ის კონსტიტუცია უკრძალავს მთავრობას რელიგიური ნიშნით დისკრიმინაციას.

ამის შემდეგ იანვრის შერბილებულ და გადახედილ დოკუმენტს ტრამპმა 6 მარტს მოაწერა ხელი. მიუხედავად ამისა, ეს დოკუმენტიც დიდხანს განიხილებოდა სასამართლოში და საბოლოოდ უზენაესმა სასამართლომ ნაწილობრივ შეიყვანა ძალაში: ლტოლვილებისა და ექვსი ქვეყნის მოქალაქეების მიღებაზე 90-დღიანი მორატორიუმი დაიწყო.

სექტემბრის ბოლოს, როდესაც მორატორიუმი ვადა იწურებოდა, ტრამპმა მესამე ბრძანება გამოსცა. ადმინისტრაციის წარმომადგენლებმა განაცხადეს, რომ ჰავაის მოსამართლის გადაწყვეტილებას სააპელაციო სასამართლოში გაასაჩივრებენ.