ზუგდიდელი აქტივისტი როსტომ ზარანდია მეორედ დაჯარიმდა ანაკლიაში, შავი ზღვის კურორტზე, გეოგლიფის წარწერის, MEGOBARI Act-ის გაკეთების გამო. გეოგლიფი აშშ-ის კანონპროექტს ეხებოდა, რომელიც საქართველოს ხელისუფლების წინააღმდეგ სანქციებს ითვალისწინებს.

სასამართლომ ზარანდია სამშაბათს გარემოს დაცვის სამინისტროს მიერ შეტანილი საჩივრის საფუძველზე დააჯარიმა. ადგილობრივი მედიის ცნობით, მოსამართლე ირაკლი აბშილავამ ჯარიმად 1 750 ლარი (დაახლოებით 650 აშშ დოლარი) განსაზღვრა და ზარანდია დამნაშავედ ცნო "ნაყოფიერი ნიადაგის ზედა ფენის მოხსნასა და გადაადგილებაში“.

დამოუკიდებელი გამოცემა "ბათუმელები" წერს, რომ ზარანდიამ და სხვა აქტივისტებმა გეოგლიფის შექმნაზე საძოვრის ტერიტორიაზე 15 დღე იმუშავეს, თითოეული სიმბოლოს სიმაღლე კი დაახლოებით 50 მეტრს აღწევდა. ნამუშევარი ნოემბრის შუა რიცხვებში დასრულდა.

ზარანდიამ გამოცემას უთხრა, რომ ამ გზით აქტივისტებს სურდათ, გამოეხატათ მხარდაჭერა აშშ-ის კანონპროექტის მიმართ და ეჩვენებინათ "პოზიციების განსხვავება" საზოგადოებასა და ხელისუფლებას შორის დასავლეთთან ურთიერთობების საკითხში. მისი თქმით, მათ გარემოსთვის ზიანი არ მიუყენებიათ.

ზარანდია ერთხელ უკვე იყო დაჯარიმებული გეოგლიფის შექმნის გამო. ინციდენტი დეკემბერში მოხდა, როდესაც ზუგდიდის მერიის გადაწყვეტილებით მას 2 000 ლარიანი (დაახლოებით 750 დოლარის) ჯარიმა დაეკისრა იმ არგუმენტით, რომ მან სახელმწიფო საკუთრებაში არსებული მიწის ნაკვეთი უნებართვოდ გამოიყენა.

ზარანდიას სამართალდამცავებთან კონფლიქტები მხოლოდ ამ შემთხვევით არ შემოიფარგლება. ივლისში იგი ფეისბუქზე გაკეთებული კომენტარის გამო, რომელშიც ზუგდიდის მერიის პრესსამსახურის თანამშრომელს "ტვინმკვდარს და ზანტს" უწოდებდა, ხუთი დღით დააკავეს. სასამართლომ იგი საჯარო მოხელის შეურაცხყოფაში ცნო დამნაშავედ. გარდა ამისა, იგი ორჯერ დაჯარიმდა ზუგდიდში წარწერების (სტენსილების) გაკეთებისთვის, რომლებიც დაპატიმრებული ჟურნალისტის, მზია ამაღლობელის, მხარდასაჭერად იყო შექმნილი.

კანონპროექტი — Mobilising and Enhancing Georgia’s Options for Building Accountability, Resilience, and Independence (MEGOBARI, ქართულად "მეგობარი") — პირველად რესპუბლიკელმა კონგრესმენმა ჯო უილსონმა 2024 წლის მაისში წარადგინა. იგი თბილისში და სხვა ქალაქებში გამართული მასობრივი პროტესტების ფონზე შეიქმნა, რომლებიც საქართველოს სადავო "უცხოური აგენტების" კანონის წინააღმდეგ მიმდინარეობდა.

კანონპროექტი კონკრეტული პირების, მათ შორის საქართველოს მთავრობის წარმომადგენლების მიმართ, "რომლებიც ძირს უთხრიან საქართველოს უსაფრთხოებას ან სტაბილურობას" სანქციების დაწესებას ითვალისწინებს.

დოკუმენტი აშშ-ის წარმომადგენელთა პალატამ 2025 წლის მაისში ორპარტიული მხარდაჭერით მიიღო. თუმცა შემდგომ ეტაპზე ის აღარ დაწინაურდა — ოკლაჰომის რესპუბლიკელი სენატორი მარკვეინ მალინი ერთ-ერთ მთავარ ფიგურად დასახელდა, რომელმაც კანონპროექტის შეტანა აშშ-ის ეროვნული თავდაცვის ავტორიზაციის აქტში (NDAA) დაბლოკა.

საქართველოსა და აშშ-ს შორის ურთიერთობები საქართველოს ხელისუფლების მიერ შემზღუდავი კანონების მიღების, 2024 წლის სადავო საპარლამენტო არჩევნებისა და ანტისამთავრობო დემონსტრანტების წინააღმდეგ პოლიციის ძალადობის ფონზე მკვეთრად გაუარესდა. ამას თან ახლდა მმართველი პარტია ქართული ოცნების განცხადებები, თითქოს დასავლეთის გარკვეული ძალები საქართველოს რუსეთთან ომში ჩათრევას ცდილობენ.

ვაშინგტონმა სანქციები დაუწესა არაერთ ქართველ ოფიციალურ პირს, მათ შორის ბიძინა ივანიშვილს — მმართველი პარტიის დამფუძნებელსა და საპატიო თავმჯდომარეს. 2024 წლის ნოემბერში, მას შემდეგ რაც თბილისმა ევროკავშირში გაწევრიანების პროცესი შეაჩერა, აშშ-მა ასევე შეაჩერა სტრატეგიული პარტნიორობა საქართველოსთან.

მმართველმა პარტიამ არაერთხელ გამოთქვა იმედი, რომ ჯო ბაიდენის ადმინისტრაციის წასვლისა და დონალდ ტრამპის პრეზიდენტად დაბრუნების შემდეგ ვითარება შეიცვლებოდა, თუმცა მოგვიანებით თბილისის მიმართ ვაშინგტონის პოზიციის არსებითი ცვლილების არარსებობის გამოუ კმაყოფილება გამოხატა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.