შალვა პაპუაშვილმა ევროკავშირის მიერ დიპლომატიური პასპორტებისთვის სავიზო რეჟიმის შემოღებასა და ზოგადად უვიზო მიმოსვლის შესაძლო შეჩერებაზე საუბრისას თქვა, რომ ბრიუსელი უვიზო მიმოსვლის წინაპირობად რუსეთისთვის სანქციების დაწესებას ასახელებს, რაც მისი თქმით, "თვითმკვლელობაა", "თუ თავი დავიხოცეთ და დავინგრიეთ, ვინღა უნდა იაროს უვიზოდ ევროკავშირში?", — განაცხადა შალვა პაპუაშვილმა დღევანდელ ბრიფინგზე. მისივე თქმით, "ქვეყანას ვერ დაანგრევენ იმის გამო, რომ ბრიუსელს უნდა ვიზა აქციოს დღეს პოლიტიკურ იარაღად".

"საქმე ეხება დიპლომატიური პასპორტებისთვის სავიზო რეჟიმის შემოღებას, ერთი. მეორე: როდესაც შემოღებულ იქნა სავიზო რეჟიმი, ეს იყო საერთაშორისო შეთანხმების დარღვევა ევროკავშირის მხრიდან. ევროკავშირი არის საერთაშორისო სამართლის დამრღვევი საქართველოს მიმართ, რაც თავისთავად უდიდესი სირცხვილია, მაგრამ ვხედავთ, რომ სირცხვილის გრძნობა მაინცდამაინც აღარ არსებობს ბრიუსელში.

იმ მომენტში, როდესაც მიხვდნენ, რომ ეს იყო საერთაშორისო სამართლის დარღვევა, შემოიღეს დამატებითი წესები სპეციალურად საქართველოსთვის, სადაც მანამდე არსებულ კრიტერიუმებს, რომელიც ტექნიკური ხასიათისაა, დაამატეს პოლიტიკური კრიტერიუმები, რომელიც არასდროს, რაც კი არსებობდა ევროკავშირი. და ეს, ქართველი ხალხი დაგვაფასეს, 4 მილიონი საქართველოში მცხოვრები მოსახლეობა და ევროკავშირმა დრო დახარჯა იმისთვის, რომ სპეციალური წესები შემოეღო და მოერგო თავისი წესები საქართველოსთვის. ეს მეორე დარღვევაა, რომ მოარგეს ევროკავშირის წესები ერთ სპეციფიკურ სუბიექტს, ამ შემთხვევაში საქართველოს.

და მესამე: ამ პოლიტიკური კრიტერიუმით გაიხსნეს, თავისი აზრით და ჭკუით, თავისუფლება, რომ რასაც უნდა, იმას მოგთხოვენ. ახლა დგანან და ფანტაზიას აღარ აქვს საზღვარი — ხან გვეუბნებიან, რომ რუსეთს დაუწესეთ სანქციები, ანუ თავი მოიკალითო, გვეუბნებიან, თუ გინდათ უვიზო მიმოსვლაო. თუ თავი დავიხოცეთ და დავინგრიეთ, ვინღა უნდა იაროს უვიზოდ ევროკავშირში, ესეც იქნებ აგვიხსნან, ხომ? ამისკენ რომ გვიბიძგებენ, საკუთარი ქვეყნის დანგრევას რომ გვთხოვენ იმით, რომ გვეუბნებიან, უნდა მოვიდეთ შესაბამისობაში სავიზო პოლიტიკასთან ევროკავშირის, ანუ დავუწესოთ რუსეთს სანქციები — ამას ითხოვენ პირდაპირ. ერთი რომ, ქვეყანას ვერ დავანგრევთ იმის გამო, რომ ბრიუსელს უნდა ვიზა აქციოს დღეს პოლიტიკურ იარაღად, რაც კიდევ მესამე დარღვევაა, როდესაც სავიზო პოლიტიკას იყენებ პოლიტიკურ იარაღად. იმიტომ, რომ სავიზო პოლიტიკა ყველას აქვს, ყველა ქვეყანას აქვს სავიზო სავიზო სისტემა", — განაცხადა შალვა პაპუაშვილმა ბრიფინგზე ვიზალიბერალიზაციაზე საუბრისას.

11 ივნისს ბრიუსელში საქართველოს უვიზო რეჟიმთან დაკავშირებით იმსჯელებენ. ევროკომისიის პრესსპიკერის, მარკუს ლამერტის განცხადებით, შეხვედრა ტექნიკური ხასიათისაა და "იმ გარემოებების გამოსწორებას" ემსახურება, რის გამოც საქართველოს დიპლომატიური და სამსახურებრივი პასპორტების მფლობელებს უვიზო მიმოსვლა შეუჩერდათ.

უნდა აღინიშნოს, რომ ევროკავშირის არც ერთ წარმომადგენელს უვიზო მიმოსვლის წინაპირობად რუსეთისთვის სანქციების დაწესების შესახებ საჯარო განცხადება არ გაუკეთებია.