ევროპის ოფიციალურმა პირებმა Financial Times-ს განუცხადეს, რომ რუსეთის წინააღმდეგ ევროკავშირის მიერ დაწესებული 21-ე სანქციების პაკეტი ბანკების, ნავთობის მოვაჭრეებისა და კრიპტო პლატფორმების მიმართ ახალ შეზღუდვებს მოიცავს. მათ შორისაა — 31 რუსული ბანკი, მესამე ქვეყნებიდან ნავთობის მოვაჭრე 20 სუბიექტი და ასევე კრიპტო პლატფორმები ბელორუსიიდან და საქართველოდან, რომლებსაც ბრალად ედებათ რუსეთისთვის სანქციების გვერდის ავლაში დახმარება.

FT-ის მიხედვით, ევროკავშირი მივიდა დასკვნამდე, რომ რუსეთის წინააღმდეგ ინდივიდუალური კრიპტობირჟების სანქცირება აღარ არის საკმარისი, რადგან სანქცირებული პლატფორმების ადგილას სწრაფად ჩნდება ახალი, ფაქტობრივად იგივე ოპერატორების მიერ შექმნილი პლატფორმები.

"მათ ბრალად ედებათ სანქცირებული სუბიექტებისთვის მომსახურების გაწევა ან ევროკავშირის შეზღუდვების გვერდის ავლაში დახმარება. მათ შორისაა ოთხი ბანკი ყირგიზეთიდან, მონღოლეთიდან და ინდოეთიდან; 11 კრიპტო პლატფორმა ბელორუსიიდან, საქართველოდან, ნიგერიიდან, პანამიდან, არაბთა გაერთიანებული საამიროებიდან და მარშალის კუნძულებიდან; ასევე ხუთი ნავთობის მოვაჭრე არაბთა გაერთიანებული საამიროებიდან", — განუცხადეს ოფიციალურმა პირებმა გამოცემას.

შეგახსენებთ, რომ ევროკომისიის პრეზიდენტმა ურსულა ფონ დერ ლაიენმა რუსეთის წინააღმდეგ დაწესებული სანქციების 21-ე რაუნდი ერთი დღით ადრე გამოაქვეყნა.