4 ოქტომბრის საქმეზე დაკავებულ 8 პირს საპროცესო შეთანხმება გაუფორმდა, რის შემდეგაც სასამართლო დარბაზიდანვე გაათავისუფლეს. ესენი არიან — ალექსანდრე გოგოლაძე,
სულხან აბრალავა, გოჩა ყატაშვილი, დავით ღურწკაია, ჯანდრი თირქია, რამაზ ჯორბენაძე და გენადი კელიხაშვილი.

საპროცესო შეთანხმება გაუფორმა ევა შაშიაშვილსაც, რომელმაც 2025 წლის 31 დეკემბერს აღკვეთის ღონისძიების სახით შეფარდებული პატიმრობა 5 000-ლარიანი არასაპატიმრო გირაოთი შეეცვალა და რუსთავის ქალთა პენიტენციურ დაწესებულება დატოვა.

საპროცესო შეთანხმება "დანაშაულის აღიარებას" და 3-წლიან პირობით მსჯავრს გულისხმობს.

"იცოდეთ, რომ მეც მანდ ვარ. გამოვედი ციხიდან მეორე ციხეში. მაგრამ გავუძლებთ. ბიჭებო,[მიმართავს სინდისის პატიმრებს] მე თქვენ გვერდში ვარ, ჩემო კარგებო. დიდი მადლობა, ბიჭებო, რომ თქვენ ეს გადაწყვეტილება მიიღეთ. მე უბრალოდ ცოტა მოხუცი ვარ და ვერ გავუძველი. ცოტა ჯანმრთელობა არ მიწყობს ხელს," — განაცხადა სასამართლო დარბაზიდან გამოსულმა ალექსანდრე გოგოლაძემ.

15-პირიან საქმეზე საპროცესო შეთანხმებაზე 7 ბრალდებული საპროცესო შეთანხმების პირობებს არ ეთანხმება, ესენი არიან — დავით ჟღენტი, ზაქრო ალბუთაშვილი, კახაბერ მჟავანაძე, დავით სტურუა, გოგი ჩახუნაშვილი და ია დარახველიძე.

2025 წლის 11 ოქტომბერს სასამართლომ ია დარახველიძეს აღმკვეთი ღონისძიების სახით 10 000-ლარიანი გირაო შეუფარდა, რომლის გადახდის შემდეგ მან იზოლატორი დატოვა. პროკურატურა დარახველიძისთვის აღმკვეთი ღონისძიების სახით პატიმრობას ითხოვდა. მოგვიანებით სასამართლო პროცესზე ცნობილი გახდა, რომ დარახველიძეს ეპილეფსიური შეტევა ჰქონდა იზოლატორში. ის ამ დროისთვის დუმილის უფლებას იყენებს.