ნარჩენების მართვის კონტროლი მკაცრდება. მომზადდა ახალი კანონპროექტი, რომელიც "ნარჩენების მართვის კოდექსში" ცვლილებების შეტანას ითვალისწინებს. რეფორმის შედეგად, საავტომობილო გზებზე გარემოს დანაგვიანების ფაქტებზე რეაგირების, ოქმების შედგენისა და დაჯარიმების უფლებამოსილება საქართველოს საავტომობილო გზების დეპარტამენტის თანამშრომლებს მიენიჭებათ, ამისათვის კი საავტომობილო გზების დეპარტამენტში სპეციალური სამსახური შეიქმნება.

"საქართველოს ადმინისტრაციულ სამართალდარღვევათა კოდექსში განსახორციელებელი ცვლილებებით, საქართველოს საავტომობილო გზების დეპარტამენტს მიენიჭება უფლებამოსილება — მის მართვაში არსებულ საავტომობილო გზებზე განახორციელოს დაჯარიმება. აქედან გამომდინარე, საჭირო გახდა შესაბამისი ცვლილებების განხორციელება
ნარჩენების მართვის კოდექსშიც", — აღნიშნულია კანონპროექტის განმარტებით ბარათში.

დოკუმენტში ვკითხულობთ, რომ აქამდე არსებულ უწყებებთან ერთად, საავტომობილო გზების დეპარტამენტის ჩართვა ნარჩენების მართვის სფეროში ადმინისტრაციული სამართალდარღვევების უფრო ეფექტურ გამოვლენასა და პრევენციას უზრუნველყოფს.

"კანონპროექტის მიღება აუცილებელია იმისათვის, რომ განისაზღვროს დეპარტამენტის
უფლებამოსილება სამართალდარღვევების გამოვლენისა და რეაგირების ნაწილში,
უზრუნველყოფილ იქნეს სამართალდარღვევებზე სწრაფი და ეფექტიანი რეაგირება, შემცირდეს გარემოს დაბინძურება საავტომობილო გზებზე და გაიზარდოს რეგულაციის პრევენციული ეფექტი", — წერია განმარტებით ბარათში.

რა იცვლება კანონპროექტით?

• საკანონმდებლო ცვლილება საავტომობილო გზების დეპარტამენტის უფლებამოსილ თანამშრომლებს აძლევს უფლებას, შეადგინონ ადმინისტრაციული სამართალდარღვევის ოქმები დარღვევებზე.

დეპარტამენტი რეაგირებას მოახდენს იმ შემთხვევაში, თუ:

• სამართალდარღვევა ჩადენილია უშუალოდ დეპარტამენტის მართვაში არსებულ საავტომობილო გზაზე ან მის შემადგენელ ნაწილზე;
  
  
• სამართალდარღვევა ჩადენილია სატრანსპორტო საშუალების გამოყენებით (მაგალითად, ავტომობილიდან ნარჩენების გადაყრა);
  
  
• უფლებამოსილი პირი უშუალოდ შეესწრება და დააფიქსირებს სამართალდარღვევის ფაქტს.
  
  
• კანონპროექტით ასევე განისაზღვრება საჯარიმო ქვითრის ფორმის, მისი შევსების, წარდგენისა და ჩაბარების ახალი, მოქნილი წესი, რომელსაც შესაბამისი უწყებები დაადგენენ.

ახალი სამსახური დაკომპლექტდება 25 თანამშრომლით. საშუალო თვიური სახელფასო ფონდი შეადგენს 120 000 ლარს. დასაქმებული პირების ხელფასიდან გათვალისწინებული იქნება საპენსიო შენატანი "დაგროვებითი პენსიის შესახებ" საქართველოს კანონით გათვალისწინებული წესით (დასაქმებულის, დამსაქმებლისა და სახელმწიფოს ნაწილში).

• საწვავის ხარჯი —300 000 ლარი წელიწადში;
  
  
• მოვლა-შენახვის ხარჯი — 350 000 ლარი წელიწადში;
  
  
• აღჭურვილობა— 50 000 ლარი.

ხსენებული სამსახურის შექმნა და დაკომპლექტება დაგეგმილია კანონპროექტის ამოქმედების შემდეგ, მიმდინარე წელსვე. შესაბამისად, აღნიშნული ხარჯების გაწევის საჭიროება დადგება და დაფინანსება დაიწყება სამსახურის შექმნისთანავე.

კანონპროექტის ძალაში შესვლა მიბმულია საკანონმდებლო პაკეტის ძირითადი პროექტის ("საავტომობილო გზების შესახებ" საქართველოს კანონში ცვლილების შეტანის თაობაზე“) ამოქმედების თარიღზე და ის გამოქვეყნებიდან 90-ე დღეს ამოქმედდება.