სკანდალებში გახვეულ შონ "დიდი" ქომბსს ახალი ბრალდებები წაუყენეს — მას ამჯერად არასრულწლოვანზე სექსუალურ ძალადობაში ადანაშაულებენ.

სარჩელის თანახმად, მსახიობი, რომლის ვინაობაც ანონიმურია და რომელიც შემთხვევის დროს არასრულწლოვანი იყო, ქომბსს 2007 წლის მაისის ერთ-ერთი შეხვედრის დროს ჩადენილ სექსუალურ ძალადობაში ადანაშაულებს.

ქომბსი ამჟამად სხვა დანაშაულებისთვის 50-თვიან სასჯელს იხდის. მისმა წარმომადგენელმა, ჯუდა ენგელმაიერმა, ბრალდებებს ცრუ და აბსურდული უწოდა: "ის უბრალოდ კიდევ ერთი არაკეთილმოსურნეა იმ ადამიანთა გრძელ სიაში, რომლებიც ცდილობენ ამ პროცესიდან ფინანსური სარგებელი მიიღონ. მისტერ ქომბსს არასდროს არავისზე უძალადია სექსუალურად — მათ შორის არც ბავშვზე! ეს ბრალდებები ისევე გაბათილდება, როგორც ყველა დანარჩენი".

სარჩელი იმ ათობით სხვა სამოქალაქო დავას ემატება, რომლებიც 2024 წელს ქომბსის დაკავების შემდეგ აღიძრა.

გასულ წელს გამართული რვაკვირიანი სასამართლო პროცესის შემდეგ, ნაფიცმა მსაჯულებმა ქომბსი გაამართლეს მძიმე ბრალდებებში, როგორებიცაა სექსუალური ტრეფიკინგი და გამოძალვა, თუმცა დამნაშავედ ცნეს ორ შედარებით ნაკლებად მძიმე მუხლში.

• "დიდის" განაჩენი ცნობილია — რეპერმა სამი ყველაზე მძიმე ბრალდება აიცილა

ამჟამინდელი მონაცემებით, ქომბსი საპატიმროს 2028 წელს დატოვებს, თუმცა მისი განაჩენის გასაჩივრების პროცესი აშშ-ის სააპელაციო სასამართლოში ჯერ კიდევ მიმდინარეობს. სანამ ქომბსი გათავისუფლებას ელოდება, მომღერლის ადვოკატები მის წინააღმდეგ მიმართულ სამოქალაქო სარჩელების ტალღას ებრძვიან.

ახალ დავაში მოსარჩელე მსახიობი აცხადებს, რომ საქმიანი ღონისძიების მიმდინარეობისას ქომბსმა ის ცალკე ოთახში გაიყვანა "პოტენციურ შესაძლებლობებზე პირისპირ სასაუბროდ", მათ შორის მომავალ პროექტზე, რომლის პროდიუსერიც თავად ქომბსი იყო. მსახიობის თქმით, მას შემდეგ, რაც "დიდის" მიერ შეთავაზებული სასმლის ზემოქმედება იგრძნო, ქომბსი ფიზიკურად შეეხო, მიუხედავად იმისა, რომ არასრულწლოვანმა მკაფიოდ გამოხატა დისკომფორტი ამგვარი შეხების გამო.

"ამის შემდეგ, მოპასუხე ქომბსმა მოსარჩელეს შარვალი და საცვალი ჩაუწია და მისი სასქესო ორგანოს შეხება დაიწყო, პარალელურად კი საკუთარ თავსაც ეხებოდა. შემდეგ, მოპასუხე ქომბსმა არასრულწლოვან მოსარჩელეზე ორალური სქესობრივი აქტი განახორციელა", — ნათქვამია სარჩელში.

უცნობია, ზუსტად რამდენი წლის იყო მსახიობი სავარაუდო ინციდენტის დროს, სარჩელში აღნიშნულია მხოლოდ ის, რომ იგი ჯერ 18 წლის არ ყოფილა.

კაცმა სასამართლოში თავის ყოფილ აგენტებსაც უჩივლა, რადგან ღონისძიების დროს მისი უსაფრთხოება ვერ უზრუნველყვეს — არ დაუნიშნეს თანმხლები პირი, არ გადაამოწმეს, დაესწრებოდნენ თუ არა პროცესს მისი მეურვეები და არ იზრუნეს იმაზე, რომ ის შოუბიზნესის ზრდასრულ წარმომადგენლებთან ერთად იზოლირებულ სივრცეებში მარტო არ დაეტოვებინათ.