რუსული მედიასაშუალებები ავრცელებენ ინფორმაციას, რომ Zara-ს, Mango-ს, Bellford-ისა და John Jeniford-ის რუსულ მაღაზიებში ჯანმრთელობისთვის საშიში ტანსაცმელი და აქსესუარები იყიდება.

როგორც Lenta.ru წერს, შემოწმების შედეგად დადგინდა, რომ აღნიშნული ბრენდების რამდენიმე მოდელის ტანსაცმელი ჰაერს არ ატარებს, რითაც "აზიანებს ორგანიზმის მიკროკლიმატს". გარდა ამისა, მედიასაშუალების მტკიცებით, ზოგიერთ ტანსაცმელს რეცხვისას ფერი გასდის.

რუსული მედიასაშუალებები ამტკიცებენ, რომ ორგანიზმისთვის ამ ბრენდების არა მხოლოდ ტანსაცმელია საშიში, არამედ აქსესუარებიც, რომელთა ნაწილი შეიცავს კიბოს გამომწვევ ნივთიერებებს. მედიასაშუალება ასევე აღნიშნავს, რომ Zara-ს მაღაზია რუსეთში არის ჰოლდინგ Inditex-ის ნაწილი, რომლის შემადგენლობაშიც არიან სხვა ბრენდები, მათ შორის Bershka, Pull & Bear და ა.შ.

Lenta.ru-სა და სხვა რუსული მედიასაშუალებების პროპაგანდისტული დასკვნები არარუსული წარმოშობის ტანსაცმლის საფრთხეების შესახებ, არ ემყარება არცერთ საერთაშორისოდ აღიარებულ ექსპერტიზის შედეგებს, გარდა ამისა, ჯერჯერობით, არც ევროპასა და არც ამერიკის შეერთებულ შტატებში, სადაც განსაკუთრებულ ყურადღებას აქცევენ უსაფრთხოებას, არ დაუყენებიათ ეჭვქვეშ ამ ბრენდების პროდუქციის სანდოობა.