RSF-მა (რეპორტიორები საზღვრებს გარეშე), CMIS-თან (მედიის, ინფორმაციის და სოციალური კვლევების ცენტრი) პარტნიორობით და CMIS-ის მონაცემების გამოყენებით, საქართველოს მედიაგარემოს შესახებ ბოლო ერთ წელიწადში — 2024 წლის ოქტომბრიდან 2025 წლის ოქტომბრამდე პერიოდზე ანგარიში გამოაქვეყნა.

ანგარიშში RSF დამოუკიდებელი ჟურნალისტების დაშინებას, შევიწროებასა და სამართლებრივ დევნას გმობს.

"RSF გმობს დამოუკიდებელი ჟურნალისტების დაშინებას, შევიწროებასა და სამართლებრივ დევნას და მოუწოდებს ხელისუფლებას, დაუყოვნებლივ შეაჩეროს ავტორიტარული უკუსვლა", — წერია ანგარიშში.

ანგარიშში აღნიშნულია, რომ ჟურნალისტთა დაკავებები ასახავს იმას, თუ "როგორ იქცა საქართველო ქვეყნად, სადაც დამოუკიდებელი მედიასაშუალებების წინააღმდეგ ყოველთვიურად თითქმის 50 ინციდენტი ფიქსირდება."

"შაბათს, 22 ნოემბერს, საღამოს, TV პირველის ჟურნალისტი, გიორგი მამნიაშვილი, რუსთაველის გამზირზე საპროტესტო აქციის გაშუქებისას გაუჩინარდა; რამდენიმე საათში პოლიციამ დაადასტურა მისი დაკავება. ადვოკატი არაადამიანურ მოპყრობაზე მიუთითებდა. მისი ინფორმაციით, ჟურნალისტი რამდენიმე საათის განმავლობაში ბორკილებით, უკან შეკრული ხელებით ჰყავდათ, არ დაარეკინეს ადვოკატთან, გარდა ამისა, გააშიშვლეს და ე.წ. ბუქნები გააკეთებინეს. ასევე, პირველივე საათებში მას ჩამოერთვა ადვოკატთან დაკავშირების უფლება. ორი კვირით ადრე, პოლიციამ ტელეკომპანია "ფორმულას" ჟურნალისტი, ლიზა ციციშვილი, იქამდე კი პლატფორმა Mediachecker.ge-ს რეპორტიორი, ნინია კაკაბაძე, დააკავეს პროტესტის გაშუქების შემდეგ. ეს დაკავებები ასახავს იმას, თუ როგორ იქცა საქართველო ქვეყნად, სადაც დამოუკიდებელი მედიასაშუალებების წინააღმდეგ ყოველთვიურად თითქმის 50 ინციდენტი ფიქსირდება", — წერია ანგარიშში.

ანგარიშში ასევე ხაზგასმულია, რომ ოცნების პრემიერმინისტრის, ირაკლი კობახიძის 2024 წლის 28 ნოემბერს გაკეთებული განცხადების შემდეგ, საქართველოში პრესის თავისუფლება მკვეთრად გაუარესდა.

ანგარიშის მიხედვით, მედიის მიზანმიმართული შეზღუდვის სტრატეგიის ცენტრში ბიძინა ივანიშვილია. დოკუმენტში ასევე ხაზგასმულია, რომ "საქართველო "რეპორტიორების საზღვრებს გარეშე" მსოფლიო პრესის თავისუფლების ინდექსში ორ წელიწადში 36 პოზიციით დაქვეითდა და 180 ქვეყნიდან და ტერიტორიიდან 114-ე ადგილი დაიკავა."

"ამ სტრატეგიის ცენტრში ოლიგარქი ბიძინა ივანიშვილია — რომელიც"რეპორტიორები საზღვრებს გარეშემ" ცოტა ხნის წინ, 2025 წლის პრესის თავისუფლების მტაცებელთა სიაში დასახელდა; ივანიშვილი გადამწყვეტ როლს ასრულებს ქვეყანაში პოლიტიკური და ეკონომიკური ზეწოლის ხასიათის განსაზღვრასა და დაუსჯელობის კლიმატის დამკვიდრებაში. პარლამენტის თავმჯდომარემ, შალვა პაპუაშვილმა, არსებული პრობლემების დაკნინება, "რეპორტიორები საზღვრების გარეშეს" დიკრედიტაციითა და ორგანიზაციის "დიფ
სთეითის" ინსტრუმენტად მოხსენიებით სცადა. დამოუკიდებელ ჟურნალისტებზე ეს თავდასხმა რეპრესიების უფრო ფართო პოლიტიკის ნაწილია. საქართველო "რეპორტიორების საზღვრებს გარეშე" მსოფლიო პრესის თავისუფლების ინდექსში ორ წელიწადში 36 პოზიციით დაქვეითდა და 180 ქვეყნიდან და ტერიტორიიდან 114-ე ადგილი დაიკავა", — წერია ანგარიშში.