აზერბაიჯანში 16 წლის გოგონამ, რომელიც ტრეფიკინგის მსხვერპლთა დასახმარებელ თავშესაფარში ცხოვრობდა, თავი მოიკლა. მედიის ინფორმაციით, იგი შენობის მეოთხე სართულიდან გადახტა.

გოგონამ, რომელიც მედიის ცნობით, ნურჯან ჯაფაროვაა, ბაქოში მდებარე "თამიზ დუნიას" თავშესაფარში თავი ოთხშაბათს მოიკლა. იგი ვარდნას გადაურჩა, თუმცა მიღებული დაზიანებების შედეგად რამდენიმე საათში გარდაიცვალა.

ბინაგადის რაიონის პროკურატურა შემთხვევას იძიებს.

ჯაფაროვა, რომელიც შამქირის რაიონიდან იყო, თავშესაფარში 11 სექტემბრიდან ცხოვრობდა.

პროსამთავრობო მედია Milli.az სახელმწიფო სოციალური მომსახურების სააგენტოს ინფორმაციაზე დაყრდნობით წერს, რომ ჯაფაროვას დედა, ვუსალა ორუჯოვა, 2014 წელს გარდაიცვალა, ხოლო მამა რუსეთში ცხოვრობდა.

21 აგვისტოს, გოგონა ნათესავების სახლიდან გაიქცა, რის შემდეგაც თავშესაფარში განათავსეს.

"ქვეყანაში დაბრუნების შემდეგ, მამამ, ელშად საფაროვმა, 18 ნოემბერს ოფიციალურად თქვა უარი", — განაცხადა სოციალური მომსახურების სააგენტომ, და აღნიშნა, რომ ჯაფაროვა თავშესაფარში სოციალური და ფსიქოლოგიური რეაბილიტაციას გადიოდა.

მიუხედავად სააგენტოს განცხადებისა, აზერბაიჯანის კანონმდებლობით, მშობლებს შვილზე უარის თქმის უფლება არ აქვთ. უცნობია, რა სამართლებრივი მექანიზმით დარჩა გოგონა მეურვის გარეშე.

Qafqazinfo წერს, რომ თავშესაფრის განცხადებით ეს პირველი შემთხვევაა, როცა მათ დაწესებულებაში თვითმკვლელობა მოხდა. თავშესაფრის ცნობით, ჯაფაროვას სახლში დაბრუნება სურდა, თუმცა არც ერთი ახლობელი არ თანხმდებოდა მის შვილად აყვანაზე.

"მისი დეიდა რამდენჯერმე დაგვპირდა, რომ მიხედავდა, მაგრამ სამწუხაროდ, არც მეურვედ გაფორმების განაცხადი შეიტანა და არც რაიმე რეალური ნაბიჯი გადადგა. გოგონას მდგომარეობის შესახებ არაერთხელ შევატყობინეთ სოციალური მომსახურების სააგენტოს", — განაცხადეს თავშესაფარში.

თავშესაფრის თქმით, გოგონამ იმედი საბოლოოდ მაშინ დაკარგა, როდესაც შეიტყო, რომ მამამ "თითქოს უარი თქვა მასზე".

ჯაფაროვას თვითმკვლელობის შესახებ ცნობების გავრცელების ფონზე, კიდევ ერთი თავშესაფრის ხელმძღვანელმა, ქამალა აღაზადამ სოციალურ ქსელში დაწერა, რომ მათი თავშესაფრიდან არასრულწლოვანი გოგონა გაუჩინარდა. ის ერთ დღეში იპოვეს, თუმცა აღაზადამ აღნიშნა, რომ ბევრ ბავშვს კვლავ აქვს პრობლემა.

"რადგან მშობლის უფლებები შეზღუდული არ არის, ოჯახთან კონტაქტი ნარჩუნდება და თუ ბავშვის მიმართ პირდაპირი დანაშაული არ არსებობს, შეხვედრები კვლავ გრძელდება", — აღნიშნა აღაზადამ.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.